काठमाडौं । फर्केर कहिल्यै नजानू । तर, कहिलेकाँही फर्काइ एकमात्र विकल्प पनि बन्न सक्छ । साउदी क्लबमा अनुबन्ध भएको १८ महिना पुग्दै थियो । नेइमार र अल–हिलालबीच अवधि नपुग्दै आपसी समझदारीमा सम्झौता रद्द गर्ने सहमति बन्यो । यसले नेइमारलाई आफ्नो बाल्यकालको ब्राजिलियन क्लब सान्तोस फर्किने अवसर बन्यो ।

अल हिलालले नेइमारलाई ७७ मिलियन पाउन्डमा फ्रेन्च क्लब पेरिस सेन्ट जर्मन (पीएसजी)बाट अनुबन्ध गरेको थियो, दुई वर्षको अवधिसहित । नेइमारको साप्ताहिक पारिश्रमिक थियो, २.५ मिलियन पाउन्ड । सम्झौता अवधि बाँकी नै रहेकाले नेइमारले त्यसमध्येको ८५ प्रतिशत रकम पाउनेछन् ।

अर्थात्, अल–हिलालबाट जम्मा सात खेल खेल्दा नेइमारमाथि साउदी क्लबले ३२२ मिलियन पाउन्ड खर्च गर्‍यो । जुन क्लबका निम्ति डरलाग्दो बर्बादी बन्यो ।

सरसर्ती हेर्दा आधुनिक खेल इतिहासमा खराब चर्चाकै लागि नेइमारको कहानी बनेको देखिन्छ, युवा अवस्थामै असाधारण दबाबदेखि सेलिब्रेटी र चर्को आर्थिक बबार्दीसम्म । अर्जेन्टिनी स्टार लियोनल मेसीसँगको तुलना नेइमारका निम्ति ठूलो दुर्भाग्य बन्यो ।

डियागो म्याराडोनापछि अर्जेन्टिनाले दोस्रो म्याराडोना पाएजस्तो देखिँदा ब्राजिललाई पनि अर्को पेलेको आवश्यकता थियो । सन् २०११ मा सान्तोसले कोपा लिबेरटाडोरेसको उपाधि जित्दा १९ वर्षीय नेइमारले पहिलो गोल गरे । यो सान्तोसले सन् १९६३ पछि जितेको पहिलो महादेशीय क्लब उपाधि थियो । जतिबेला नायक बनेका थिए, ब्राजिलियन लेजेन्ड पेले । त्यसबेला ब्राजिलले नयाँ पेले पाएजस्तो देखिन्थ्यो । तर, कुनै पनि फुटबलर पेलेसँगको तुलनामा रहन सक्दैन । अनि, नेइमार आफ्नै सक्षमताको कैदी बने ।

नेइमारलाई ब्राजिलियन लेजेन्डसँग तुलना गर्नुको अर्थ उनीबाट समर्थकको ठूलो आशा थियो । सन् २०१० मा सान्तोसले कोपा डो ब्राजिलको उपाधि जिते पनि नेइमार भने पेनाल्टी सदुपयोग गर्न असफल रहे । सोही कारण एक हप्तापछि लिगको खेलमा प्रशिक्षक डोरिभल जुनियरले पेनाल्टीका निम्ति नेइमारबाहेक अरू खेलाडीलाई अघि सर्न निर्देशन दिए ।

प्रशिक्षकको यस्तो आदेशपछि निराश बनेका नेइमारलाई शान्त बनाउन लाइन्समेन अघि सर्नुपर्‍यो । यस घटनापछि प्रशिक्षक डोरिभलले नेइमारलाई दुई हप्ता निलम्बन गर्न सिफारिस गरे । तर, क्लबले नेइमारलाई निलम्बन गरेन, उल्टै प्रशिक्षक डोरिभललाई नै बर्खास्त गरिदियो ।

२१ वर्षको उमेरमा नेइमारले सान्तोस छाडे । ब्राजिलियन क्लबबाट बार्सिलोना पुग्दा पनि नेइमारको आलोचना कम हुन सकेन । उनको गल्ती नभए पनि बार्सिलोनाले सम्झौता गर्दा स्पेनिस क्लबलाई कर छलीको आरोप लाग्यो । यही कर छली काण्डले गर्दा बार्सिलोनाका तत्कालीन अध्यक्ष सान्ड्रो रोसेलले राजीनामै बुझाउनुपरेको थियो । त्यसपछि अध्यक्षमा आएका जासेप मारिया बार्टोमेउको कार्यकालमा क्लबमा आर्थिक अनियमितता झनै बढ्यो । बार्टोमेउको कार्यकालबाट सुरु भएको आर्थिक मन्दीले बार्सिलोनालाई अझैसम्म गाँजिरहेको छ ।

स्पेनिस क्लबबाट मैदान उत्रिएको पहिलो सिजन नेइमारले ठूलै संघर्ष गरे । युरोपियन फुटबलको ‘फिजिकालिटी’मा अभ्यस्त हुन पनि नेइमारलाई समय लाग्यो । पहिलो सिजन बार्सिलोनाबाट नेइमारले नौ गोल गरे पनि क्लब भने उपाधिविहीन रह्यो । 

लगातारको औसत प्रदर्शनले नेइमारमाथि स्वभावलै दबाब थपिँदै गएको थियो । झन् बार्सिलोनाबाट प्रदर्शन सन्तोषजनक बन्न नसक्दा अर्को वर्ष भएको विश्वकपमा नेइमारमाथि सशक्त प्रदर्शनको चर्को दबाब बन्यो ।

विश्वकपको क्वार्टरफाइनलमा कोलम्बियाविरुद्ध ढाडमा गहिरो चोट बोकेपछि भने नेइमारमाथि केही सान्त्वनाका स्वर थपिए । नेइमार घाइते भए, ब्राजिल जर्मनीसँग ७–१ को लज्जास्पद हार बेहोर्दै सेमिफाइनलबाट बाहिरियो ।

बार्सिलोनाबाट दोस्रो सिजन भने नेइमारका निम्ति सबैभन्दा उत्कृष्ट बन्यो । अर्जेन्टिनी कप्तान मेसी र उरुग्वेका लुइस स्वारेजसँग अग्रपंक्तिमा गजबको तालमेल बन्दा बार्सिलोनाले तेहेरो उपाधि जित्यो । उनले च्याम्पियन्स लिगको फाइनलमा गोल पनि गरे । तर, बर्लिनमा सम्पन्न च्याम्पियन्स लिगको फाइनलको एक हप्तापछि नै नेइमारले कोपा अमेरिकाअन्तर्गत कोलम्बियाविरुद्ध मूखर्तापूर्ण व्यवहार देखाए । सोही कारण नेइमारले रातो कार्ड बेहोरे, सँगै चार खेलको प्रतिबन्ध पनि । 

सन् २०१६ मा ब्राजिलमै भएको ओलम्पिकमा ब्राजिललाई फुटबलतर्फ स्वर्ण पदक दिलाए पनि अन्तर्राष्ट्रिय प्रतियोगिताले नेइमारमाथि कहिल्यै दया देखाएन । तीनपटक कोपा अमेरिकामा ब्राजिलको प्रतिनिधित्व गरे पनि नेइमारले उपाधि चुम्न भने पाएनन् । सन् २०१९ मा ब्राजिलले उपाधि जित्दा नेइमार चोटका कारण टिममा थिएनन् ।

ब्राजिलबाट विश्वकपका चार संस्करणमा प्रतिस्पर्धा गर्दा नेइमार सधैँ चर्चाको केन्द्रमा रहन्थे । तर, विश्वकपमा पनि उनलाई क्वार्टरफाइनलभन्दा माथिल्लो स्तरमा प्रतिस्पर्धा गर्ने अवसर नै जुरेन ।

नेइमारको करियरमा सबैभन्दा महत्त्वपूर्ण वर्ष बन्यो– सन् २०१७ । उनी बार्सिलोना छाड्ने निर्णयमा पुगे र पीएसजीमा आबद्ध भए । त्यसबेला नेइमार भित्र्याउन कतारी मालिकको स्वामित्व रहेको पीएसजीले कीर्तिमानी २२२ मिलियन युरो खर्चेको थियो । यो अहिलेसम्म पनि सरुवा बजारमा कुनै खेलाडीका निम्ति खर्चिएको सबैभन्दा ठूलो रकम हो । यसले खेलाडीको मूल्य ह्वात्तै बढाइदिँदा युरोपका अधिकांश क्बलले आर्थिक मन्दीको सामना गर्नुपर्‍यो ।

एक हिसाबले नेइमार पीएसजीमा अनुबन्ध हुँदा सरुवा बजारको स्वाभाविक आर्थिक लेनदेनको बाटो नै भताभुंग बन्यो । कतिपय क्लब नयाँ खेलाडी अनुबन्ध गर्ने नसक्ने स्थितिमा पुगे ।

नेइमारको आगमनपछि पीएसजीले फ्रेन्च लिगमा दबदबा बनाए पनि च्याम्पियन्स लिगको उपाधि भने जित्न सकेन, न त आफूले चाहेको बालन डी‘अर नै उनले जित्न सके । नेइमार र पीएसजी दुवैको यो निर्णय व्यर्थ बन्यो । नेइमार आफ्नो क्षमताभन्दा तल्लो स्तरमा प्रदर्शन गरिरहेका थिए । यस अवधिमा चोटले पनि नेइमारलाई समातिरह्यो । च्याम्पियन्स लिगमा कुनै ठूलो प्रतिद्वन्द्वीविरुद्ध खेल्नुअघि नेइमार सधैँ चोटिल रहन्थे । 

इन्जुरीले नै नेइमारको साउदी अरेबियन क्लबसँगको अवधिलाई बर्बाद बनायो । साउदी क्लबका सान्तोसमा फर्किंदा नेइमारले आफ्नो पारिश्रमिक ९९ प्रतिशत कटौती गरेको रिर्पोट सार्वजनिक भएका छन् ।

आशा गरौँ, नेइमारले अब आफ्नो प्राथमिकताहरूको पुनः मूल्यांकन गर्नेछन् । आफूले पैसा, प्राथमिकता वा प्रशंसाका लागि खेलेको होइन । तर, आफ्नो लगावका निम्ति खेलेको बुझ्नेछन् ।

कहिलेकाहीँ अन्तिम विन्दु नै सुरुआतको नयाँ बाटो बन्न पुग्छ । अहिले नेइमार त्यही अवस्थामा छन् । यो एकदमै फरक नेइमार हो– ढल्किँदो उमेरको, कम आशावादी, फुटबलले नराम्ररी घुमाएको, जो आफ्नै पुरानो घरमा फर्किएको छ ।

द गार्जियनमा प्रकाशित स्टोरीका भावानुवाद ।