काठमाडौं । नेपाली कांग्रेसको केन्द्रीय समिति बैठकले कांग्रेसका नौवटा भ्रातृ संस्थाको एकसाथ म्याद थपेको छ । शनिबारको कांग्रेस केन्द्रीय समिति बैठकबाट नौवटा भ्रातृ संस्थाको एकसाथ म्याद थपेर वैधानिकता दिइएको हो । 

नेपाली कांग्रेसले आवधिक निर्वाचनलाई लोकतन्त्रको मुटु भन्दै देशमा र पार्टीमा आवधिक निर्वाचन लागु नभए प्रजातन्त्र धरापमा पर्ने बहस गर्दै आएको छ । 

तर, शनिबार कांग्रेसले म्याद थपेरै वैधानिकता दिएका भ्रातृ संस्थाहरुमध्ये कोहीको १६ वर्षम्म महाधिवेशन भएको छैन भने कुनैका नौ वर्षसम्म महाधिवेशन हुन सकेको छैन । 

नेपाल किसान संघको महाधिवेशन नभएको १६ वर्ष पुगेको छ भने विगत नौ वर्षदेखि नेपाल दलित संघको महाधिवेशन भएको छैन । 

त्यसबाहेक तीन वर्षमा महाधिवेशन गर्ने वैधानिक व्यवस्था गरेको नेपाल तरुण दलको वर्तमान कार्यसमितिले ५ वर्ष पूरा गरेको छ । 

२०७३ सालमा पोखरा महाधिवेशन गए पनि महाधिवेशनको चुनावी प्रक्रिया रोकर नेताहरुले भागबण्डामा पाँच पदाधिकारी नियुक्त गरेका थिए । 

अध्यक्ष जीतजंग बस्नेतले पटक पटक भन्दा पनि केन्द्रीय नेतृत्वले बाँकी पदाधिकारी तथा सदस्य नियुक्त गरेर कार्यसमितिलाई पूर्णता दिन दिएको छैन । 

२०७३ साल भदौमा नेपाल विद्यार्थी संघको महाधिवेशन भएयता अर्को महाधिवेशन हुन सकेको छैन । 

जबकी नेविसंघको विधानमा प्रत्यक दुई वर्षमा महाधिवेशन सम्पन्न गर्नुपर्ने, महाधिवेशन हुन नसक्ने विशेष अवस्था भएमा थप छ महिना म्याद थप गर्नुपर्ने र त्यस अवधिमा पनि महाधिवेशन गर्न नसके स्वतः कार्यसमिति भंग हुने व्यवस्था छ । 

२०७३ सालमा महाधिवेशनबाट आएको नैनसिंह महर नेतृत्वको नेविसंघको कार्यसमितिले ७५ भदौमा महाधिवेशन गर्न सकेन ।

थप छ महिना कार्यकाल थपियो –तर पनि महाधिवेशन हुन सकेन । 

त्यतिबेलासम्म महाधिवेशनका धेरै काम भइसकेको भन्दै महरसहितका पदाधिकारीले महाधिवेशनबाटै नेतृत्व हस्तान्तरणको व्यवस्था गरिदिन नेतृत्वलाई ज्ञापन पत्र बुझाए सार्वजनिक अपिल समेत गरे । तर नेतृत्व तयार भएन र अन्यमा महरले राजीनामा दिए । 

केही महिनाको रिक्ततापछि राजीव ढुंगानाको नेतृत्वमा नेविसंघका पदाधिकारी भागवण्डामा नियुक्त भए । तर, त्यो कार्यसमितिले न पूर्णता पाउन सक्यो न त विद्यार्थीसँग जोडिएर कुनै गतिविधिनै सञ्चालन गर्न सकेको छ । 

कांग्रेसका भ्रातृ तथा शुभेच्छुक संस्थामध्ये अहिले नेपाल ट्रेड युनियन कांग्रेसबाहेक कुनै पनि संगठन वैधानिक हैसियतमा छैनन् ।