काठमाडौं । नेपाल आइडल सिजन–४ मा अघिल्ला सिजनका निर्णायकहरुले निरन्तरता नपाउने भएपछि आयोजकले नयाँ जज खोजिरहेको छ । यसअघिका निर्णायकहरु न्ह्यू बज्राचार्य, कालीप्रसाद बास्कोटा र इन्दिरा जोशी अरु नै टेलिभिजनको रियालिटी शोमा आबद्ध भएपछि नेपाल आइडल सिजन–४ मा नयाँ निर्णायक भित्रिन लागेका हुन् ।

नयाँ निर्णायक हालसम्म निश्चित भइनसकेको तर केही गायक–गायिकाहरुसँग कुरा भइरहेको नेपाल आइडल निर्देशक सुरेश पौडेल बताउँछन् ।

आयोजकले को–कोसँग निर्णायकका लागि छलफल भइरहेको छ भनेर नखुलाए पनि सुगम पोखरेल भने करिब–करिब निश्चित भइसकेका छन् । आइडलले गरेको प्रस्तावमा उनले सहमति जनाइसकेका छन् । यद्यपि, सम्झौता भने भइनसकेको स्रोतको भनाइ छ । 

नेपाल आइडलको पहिलो सिजनमा पनि सुगमलाई आयोजकले निर्णायकका लागि प्रस्ताव गरे पनि उनले अस्विकार गरेका थिए । 

यस्तै, अन्य निर्णायकका लागि सम्भुजित बास्कोटा र उदय सोताङसँग पनि आइडलले छलफल गरिरहेको स्रोतको दावी छ । यदि दुवैले अस्विकार गरेको अवस्थामा राजेश पायल राई र रामकृष्ण ढकाल आयोजकको प्राथमिकतामा रहेको स्रोत बताउँछ ।   
महिला निर्णायकका लागि मिलन नेवार र मेलिना राईसँग कुरा भइरहेको स्रोतको भनाइ छ ।   
 
नेपाल आइडलको पहिलो सिजनबाट तेस्रो सिजनसम्म न्ह्यू बज्राचार्य, कालीप्रसाद बास्कोटा र इन्दिरा जोशी निर्णायक थिए । उनीहरु अहिले ग्यालेक्सी फोके टेलिभिजनबाट प्रशारणको तयारीमा रहेको म्युजिकल रियालिटी शो सारेगम लिटिल च्याम्प्समा निर्णायकमा आबद्ध भइसकेका छन् ।