किउल  (सिन्धुपाल्चोक) । परिवारको सुखको खोजी गर्दै दुई वर्षअघि मीना थापामगर वैदेशिक रोजगारीमा पुगेकी थिइन् । अर्काको भूमिमा श्रम–सीप खन्याइन् । त्यसबापत उनले केही रुपैयाँ पनि कमाइन् ।

घरमा आफ्ना सन्तान र श्रीमान्लाई छाडेर गएकी उनले धेरै वर्ष पराया भूमिमा बिताउन उचित ठानिनन् । वैदेशिक रोजगारीबाट फर्किएपछि घर बनाइन् र त्यहीँ पसल थापिन् ।

जीवनमा दुःखबाहेक अरूसँग परिचय नपाएकी उनको जिन्दगीमा खुसी भित्रँदै थियो । सिन्धुलाल्चोकको हेलम्बु गाउँपालिका–१, चिउरीखर्ककी मीना भन्छिन्, “जसोतसो सुखै भएको थियो । यस्तो अर्काको ठाउँमा गएर दुःख गर्न कहाँ सजिलो थियो र !”

चिउरीखर्कवासीसँग आफ्नै नाममा एक टुक्रा पनि जमिन छैन । साहुको जग्गामा अधियाँ कमाउने हुन् उनीहरू ।

वैदेशिक रोजगारीबाट फर्किएपछि मीनाको जीवनमा भने कायाकल्प भयो । व्यापार राम्रै चलेकाले झन्डै ३० लाखजतिको सम्पत्ति पनि जोडिन् ।

तर, असार १ र त्यसपछि हेलम्बु नदीमा आएको विनाशकारी बाढीले उनको खुसी अनायास निभाइदियो । उनको सपनाको संसार पलभरमै उराठ र उच्चाटिलो बगरमा परिणत भयो ।

यति बेला उनको परिवारको बास त्रिपालमुनि छ । बाह्रखरीकर्मीसँग कुरा गर्दा मीनाले आफूलाई  सम्हाल्न सकिनन् । मीना भन्छिन्, “एकैपलमा सबै सकियो । सुख हुन्छ कि भनेर दुई वर्ष विदेश पनि गएँ । त्यही पैसाले अलि–अलि सामान जोडेको थिएँ । ३०/३५ लाखको थियो । त्यो पनि गयो ।”

मेलम्चीको बाढीअघि मीना आफ्नो पसलमा छोरीसँग ।

उनलाई आफ्नोभन्दा पनि परिवारको पीर छ । मीना भन्छिन्, “हाम्रो त आधी उमेर गयो । तर, बालबच्चाको हालत के होला ? पत्रकारहरुले सहयोग गरिदिनुहोस् । बाँच्नु न मर्नु भएको छ । अर्काको ठाउँमा गएर दुःख गर्न सजिलो थिएन । तर, अहिले पकाएर खानेसम्म भाडा छैन । अब बालबच्चको के हालत हुन्छ होला । घर बनाएर बस्नेसम्म ठाउँ छैन ।”

असार १ र ३ गते आएको विनाशकारी बाढीले तिम्बु–किउल जोड्ने सडकखण्ड आसपासका २० घर बगरमा परिणत भए ।

०७२ सालमा आएको विनाशकारी भूकम्पले उनीहरू विस्थापित भएर चिउरीखर्कमा पुनःस्थापित भएका थिए । तर, बाढीले उनीहरूको घरखेत, जायजेथा लगेपछि उनीहरू खुला आकाशमुनि बस्न बाध्य भएका छन् ।

आफ्नै घरमा सुखसँग बाँचिरहेका उनीहरू राहत कहिले आउला भनेर बाटो कुरिरहेका छन् ।

मीनामात्रै होइन, सुनीता थापामगरको घर पनि हेलम्बु बाढीले बगाएको छ । घरको अवशेषका रूपमा जग बाँकी छ । आफ्नो घर सम्झिँदै उनी भक्कानिन्छिन्, “साँझ हेलम्बु नदी गड्गडाउँदै आयो । घरभन्दा ठूला ढुंगा बगेर आउन थाले । हामी सुरक्षित स्थानमा गयौँ । बिहान आउँदा त घर नै बाँकी थिएन ।”

मीना र सुनीताजस्तै २० जनाको घर बाढीमा परेको छ । घर पुरिएका हुन् वा बगेको यकिन हुनसकेको छैन ।

बाढीले बगाउनुअघिको चिउरीखर्क र ओढारे जोड्ने झोलुंगे पुल ।

चिउरीखर्क र ओढारेबीचबाट हेलम्बु/मेलम्ची नदी बग्ने गर्दछ । सोही स्थानमा झोलुंगे पुलसमेत थियो । मेलम्चीको बाढीले पुल बगाएपछि दुई गाउँको सम्पर्कसमेत टुटेको छ । पारिका मानिस के–कस्तो अवस्थामा छन्, ज्ञात हुनसकेको छैन ।

भिडियो हेर्नुहोस्