हेलम्बु । असार १ गते साँझबाट मेलम्ची नदीमा आएको भीषण बाढीले हेलम्बु क्षेत्र तहसनहस पार्यो ।
मेलच्ची बजारसम्म आइपुग्दा धेरै जनधनको क्षति भयो । हेलम्बु गाउँपालिकामा २३ जना अझै बेपत्ता छन् । खोलाको बहाब घटबढ भइरहेको छ । अझै क्षति हुने सम्भावना छ । जोखिमयुक्त क्षेत्रका मानिसहरु सुरक्षित स्थानमा सर्ने क्रम जारी छ ।
हेलम्बु गाउँपालिका १ तिम्बुबाट मेलम्ची खानेपानीको मुहानतर्फ जाने बाटोमा रहेको सशस्त्र प्रहरी क्याम्प खोलामा मिसियो ।
सँगै रहेको आर्मी क्याम्पनजिकैका दुईवटा घर पनि बाढीले बगायो ।
घर बाढीमा मिसियो । स्थानीय आशाकुमारी गुरुङका परिवारका सदस्य भने बाँच्न सफल भए । तर, घरभित्रका सामान निकाल्न बाढीले दिएन ।
बाह्रखरीकर्मी त्यहाँ पुग्दा उनी खोलाले सामान पाखा लगायो कि भन्दै हेर्न आइपुगेकी रहिछन् ।
“खोला यसरी सर्छ भन्ने त सोच्न नि सकेनौं । मन थाम्नै सकिएन । अरुलाई पनि पीडा परेको होला । यतिबेला आफ्नै पीडा ठूलो हुँदो रहेछ । सामान पाखामा फाल्यो कि भनेर हिजो पनि आएका थियौँ,” उनले पीडा पोखिन्, “धेरै क्षति भयो । भन्न सक्दिन जिन्दगीभरको कमाइ गयो । मान्छेहरुका करोडौंको सम्पत्ति अर्थात् भएभरको कमाइ नै लग्यो । जिन्दगी निर्वाह गर्ने बाटो राखेन । के गरि गर्ने होला । सुनहरु पनि निकाल्न पाएनौं । एकसरो लुगामा निस्कियौं ।”
उनका श्रीमान्ले काठ चिर्ने काम गर्छन् । उनले केही दिन अघि मात्रै काठ चिर्ने मेसिन किनेर ल्याएका थिए ।
उक्त मेसिन पनि बाढीमा मिसियो । आशाकुमारीका आँखा ओभाएका छैनन् । “बरु म मरेको भए केही सुुन्न पर्दैनथ्यो । केही सहन पर्दैनथ्यो । जस्तो भइसक्यो । हामी गरिबलाई धेरै क्षति पुर्यायो,” उनले कुराकानीका क्रममा भनिन् ।
उनका बालबच्चालाई नजिकै रहेका सेनाले बचाए । परिवारका सदस्य बाँच्न सकेकोमा पीडा कम हुने आधार भने बनेको छ ।
“आर्मी ब्यारेकको सरले काखमा च्याप्न सक्नुभएन । पाखुरामा च्यापेर लैजानुभयो,” उनले आफ्ना बच्चालाई गरेको उद्धारबारे सुनाइन् ।