काठमाडौं । नेपाल विद्यार्थी संघले उपप्रधान एवं सहरी विकासमन्त्री राजेन्द्र महतोको अभिव्यक्तिप्रति आपत्ति जनाएको छ ।
महतोको अभिव्यक्ति नेपालको स्वतन्त्रता, सार्वभौमिकता, भौगोलिक अखण्डता, राष्ट्रिय एकता, स्वाधीनता र स्वाभिमानको विरुद्धमा रहेको संघको ठहर छ ।
“संविधान कार्यान्वयन गर्ने निकायमा पुगेको र संविधान कार्यान्वयन र संरक्षणको जिम्मेवारी पूरा गर्नुपर्ने व्यक्तिबाटै यस प्रकारको संविधानविरोधी अभिव्यक्ति आउनु विडम्बनाको विषय हो,” नेविसंघका महामन्त्री बलदेव तिमल्सिनाले भनेका छन् ।
संविधानले नै नेपाललाई ‘बहुजातीय, बहुभाषिक, बहुधार्मिक, बहुसांस्कृतिक’ मुलुक भनेको अवस्थामा ‘बहुल राष्ट्रिय राज्य’ निर्माण गर्ने अभिव्यक्ति अत्यन्तै संवेदनशील र विवादित रहेको उनले जनाएका छन् ।