जनकपुरधाम । धनुषामा एक साता निषेधाज्ञा थप भएको छ । सोमबार विहान जिल्ला विपद् व्यवस्थापन समितिको बैठकले एक साता निषेधाज्ञा थप गर्ने निर्णय गरेको हो ।
 
बैठकले जेठ १७ गतेसम्म जिल्लाभर निषेधाज्ञा थप गरेका छन् । धनुषामा वैशाख २१ गतेदेखि निषेधाज्ञा जारी भएको छ । प्रदेश २ का जिल्लाहरु कोरोनाको हटस्पट बन्न थालेपछि सबै जिल्लामा निषेधाज्ञा जारी गरिएको हो । कोरोनाको ग्राफ उकालो लागेपछि सबै जिल्लामा निषेधाज्ञा विभिन्न चरणमा थपसमेत हुने गरेको छ ।
 
धनुषामा निषेधाज्ञमा अतिआवश्यक बाहेक हरेक गतिविधि बन्द राख्न विज्ञप्तिमार्फत जनाइएको छ । स्वास्थ्य, सुरक्षा, सञ्चार, विद्युत, खानेपानी र तरकारी मण्डी मात्र र नेपाल राष्ट्र बैंकको अनुसार वित्तिय संस्था मात्र खोल्न आदेश दिएको धनुषाका प्रमुख जिल्ला अधिकारी बन्धुप्रसाद वास्तोलाले जानकारी दिए । विहान ६ बजेदेखि ९ बजेसम्म औषधि व्यवसाय, पेट्रोल, फलफूल, ग्यास पसल र दुध डेरी खोल्न अनुमति दिएको छ । “अतिआवश्यक व्यावसाय तथा संस्थाहरु विहान खोल्न दिएको छु । तर, वहाँहरु बेलुका पनि लुकिछिपि खोल्ने गरेको थियो,” प्रजिअ वास्तोलाले भने, “बेलुका पूर्णरुपमा बन्द गर्ने र अनुगमन बढाउने निर्णय भएको छ ।”

निषेधाज्ञा कडा बनाउन मातहतको सबै कार्यालयलाई पत्राचार गरिएको छ । आइतबारदेखि धनुषामा सशस्त्र प्रहरी परिचालन गरी निषेधाज्ञा कडा बनाइएको छ । चोक–चोकमा होल्डिङ सेन्टरमा निषेधाज्ञा उलंघन गर्नेलाई राख्ने गरेको छ ।