वासिङटन । अन्तर्राष्ट्रिय विकासका लागि अमेरिकी एजेन्सी, (युएसएड) ले नेपाललाई बढ्दो कोभिड कहरको सामना गर्न आपत्कालीन सहयोगको घोषणा गरेको छ । अमेरिकाबाट सहयोग लिएर आएको तीन मध्येको पहिलो विमानमा नेपालका हजारौँ स्वास्थ्यकर्मीहरुका लागि सर्जिकल मास्क, फेस सिल्ड र पन्जा रहेको छ । 

संक्रमण नियन्त्रण गर्न अमेरिकाले नेपाललाई सक्दो मद्दत गर्ने प्रतिबद्धता सहित यस्तो घोषणा गरेको हो । युएसएडले नेपाल सरकारलाई कोभिड परीक्षण, कन्ट्याक्ट ट्रेसिङ अनि उपचारको दायरा बढाउन, यसअघि १ करोड ५० लाख डलर पनि प्रदान गरेको छ । त्यसैगरी अक्सिजन आपूर्तिमा पनि सघाइरहेको छ । 

पछिल्लो १५ महिनामा युएसएडले नेपाललाई कोभिड–१९ सम्बन्धी ५ करोड डलर भन्दा धेरै रकम बराबरको सहयोग प्रदान गरिसकेको जनाएको छ । 

यसरी नेपालको स्वास्थ्य सेवाको गुणस्तरमा सुधार ल्याउन पछिल्लो २० वर्षमा अमेरिकाले ६० करोड डलर बराबर सहयोग गरिसकेको छ । 

महामारीको सुरुवातदेखि युएसएडले गरेको सहयोगले नेपालको ६० प्रतिशत जनसङ्ख्यामा लाभ पुगेको बताइएको छ ।

युएसएडले कोभिड परीक्षणको दायरा बढाउन सिङ्गो ल्याबबाट देशभर ८७ बढी ल्याबहरु स्थापना गर्न मद्दत पुर्याएको हो ।

त्यस्तै पछिल्लो ६ महिनामा अमेरिकाले नेपालमा अक्सिजन सिलिन्डर, पल्स अक्सिमिटर, पीपीई, डिस्इन्फेक्टेन्ट, थर्मोमिटर, ‘आर्टिअल ब्लड ग्यास मेसिन’ लगायत अन्य थुप्रै अतिआवश्यक स्वास्थ्य सामग्रीहरु पनि आपूर्ति गराएको छ । गत नोभेम्बरमा मात्र युएसएडले नेपालका ५१ अस्पताललाई १०० भेन्टिलेटर र एम्बुलेन्स सेवा पनि प्रदान गरेको थियो ।