काठमाडौं । निषेधाज्ञाबीच काठमाडौं उपत्यकामा फेरि सवारी चाप बढ्न थालेको छ । पछिल्लो समय राजधानीका सडकमा सवारी चाप बढेको देखिएको हो ।

कोरोना संक्रमण रोकथाम तथा नियन्त्रणका लागि जारी गरिएको निषेधाज्ञाको आज १९औँ दिन भएको छ । ६५ भन्दा बढी स्थानमा चेक प्वाइन्ट राखेर सवारी चेकजाँच भइरहेको महानगरीय ट्राफिक महाशाखाले जनाएको छ ।

निषेधाज्ञा पालना गराउनको लागि नेपाल प्रहरीको टोली खटिएको छ  । तर, पनि सडकमा सवारीको चाप देखिन्छ । निषेधाज्ञा उल्लंघन गरी कारबाहीमा पर्ने सवारी र चालकको संख्या पछिल्ला केही दिनयता बढेको महाशाखाले जनाएको छ ।

ट्राफिक प्रहरीका अनुसार गएको सोमबार दिनभर दुई हजार १६० वटा सवारी–साधन नियन्त्रणमा लिइएको थियो । जसमा ६६८ वटा चारपांग्रे र एक हजार ४९२ दुईपांग्रे सवारी–साधन थिए । आइतबार एक हजार ५०१ सवारी–साधन नियन्त्रणमा लिइएको थियो । महाशाखाले शनिबार एक हजार ७४० वटा सवारी–साधनलाई नियन्त्रणमा लिएको थियो ।

काठमाडौं महानगरपालिकामा आइतबारदेखि कोरोनाविरुद्धको भेरोसेल खोपको दोस्रो मात्र लगाउन थालिएको छ । त्यसले गर्दा पनि सडकमा सवारी र मानिसको भिडभाड भएको हुन सक्ने ट्राफिकको अनुमान छ ।

मंगलबार दिउँसो १ बजेसम्म ट्राफिक प्रहरीले ३५ सय सवारी–साधनलाई ‘होल्ड’ गराएको थियो ।

झुक्क्याएर घुमफिर
महानगरीय ट्राफिक प्रहरी महाशाखाका एसएसपी जनक भट्टराई आफूहरुले सक्रिय भएर सडकमा सवारी–साधन चेकजाँच गरिरहेको बताउँछन् । कतिपय अवस्थामा मानिस अत्यावश्यक कामले निस्किएको हो वा होइन भन्ने छुट्ट्याउन गाह्रो पर्ने गरेको उनको भनाइ छ ।

‘‘कोरोना संक्रमण भएर जाँच गर्न हिँडेको, बिरामी भएर अन्य उपचार गर्न हिँडेको, संक्रमितको मृत्यु भएर अन्तिम संस्कार गर्न हिँडेको भन्नेहरु धेरै छन् । त्यसैले पनि ट्राफिक प्रहरीलाई सकस परिरहेको छ,” उनले भने ।

अनावश्यक हिँड्डुल गर्नेलाई कारबाहीको दायरामा ल्याइएको उनले बताए । ‘‘पछिल्लो समय हामीले आवश्यक काममा भन्दा पनि अनावश्यक काममा हिँड्नेहरु धेरै भेट्टाएका छौँ,” एसएसपी भट्टराईले भने, ‘‘राजधानीमा जनसंख्याको चाप बढी भएकाले सडकमा केही मात्रामा सवारी चाप देखिएको छ । त्यसैले अहिले सवारी–साधन नै नियन्त्रणमा लिने गरेका छौँ ।”

‘निषेधाज्ञामा कडाइ गरेका छौँ’
स्वास्थ्य मापदण्ड पालना नगर्नेलाई नेपाल प्रहरीले नियन्त्रणमा लिने गरेको प्रहरी प्रवक्ता एसएसपी वसन्तबहादुर कुँवर बताउँछन् । ‘‘काठमाडौं उपत्यकामा संक्रमण दर देशकै आधाभन्दा बढी छ । यस्तो अवस्थामा प्रहरीले उपत्यकाको संक्रमण घटाउन निषेधाज्ञामा कडाइ गर्दै आएको छ,” उनले भने, ‘‘माथिल्लो निकायको निर्देशनबमोजिम हामीले निषेधाज्ञामा कडाइ गरेका छौँ ।”

यसकारण सवारी चाप !
काठमाडौंका प्रमुख जिल्ला अधिकारी कालीप्रसाद पराजुली काठमाडौं उपत्यकामा संक्रमण दर बढिरहेकाले स्वास्थ्य मापदण्ड र निषेधाज्ञाको अनिवार्य पालना गर्नुपर्ने बताउँछन् । अहिले विभिन्न अत्यावश्यक क्रियाकलापले सडकमा सवारी चाप देखिएको उनको भनाइ छ ।

‘‘बैंकिङ क्षेत्र, शव व्यवस्थापन, अस्पतालका चिकित्सक, बिरामीलगायत मानिस बढ्दै जाँदा सडकमा पछिल्लो समय सवारी चाप देखिएको छ । कतिपय मानिस बेलैमा गाउँ गइसकेका छन् । त्यसबाहेक राजधानीमा रहेका मानिसहरुको हकमा भिडभाड देखिन थालेको छ,” प्रजिअ पराजुलीले भने, ‘‘कडाइ गर्न प्रहरीलाई भन्दै पनि आएका छौँ । हामी आफैँ सडकमा अनुगमनमा गइ निषेधाज्ञा पालना गर्न आग्रह गरिरहेका छौँ । अहिले नै निषेधाज्ञा सकिएको छैन । निषेधाज्ञा सकिन अझै नौ दिन बाँकी नै छ । संक्रमणको दर हेरेर निषेधाज्ञा लम्ब्याउन सकिने वा नसकिने निर्णय पछि हुन्छ । १३ गतेसम्मलाई निषेधाज्ञामा कडाइ गर्न भनेका छौँ ।”