जनकपुरधाम । प्रदेश २ मा अक्सिजन अभाव भएको छ । कोरोना संक्रमण समुदाय स्तरमै फैलिरहेका बेला अक्सिजनको अभाव भएको हो । मागअनुसारको उद्योगले अक्सिजन उत्पादन गर्न नसक्दा आपूर्तिमा समस्या भएको व्यवसायीहरूको भनाइ छ ।
प्रदेश २ स्वास्थय निर्देशनालयका निर्देशक डा. प्रमोद यादवले भने प्रदेशमा मा अक्सिजन अभाव रहेको बताए । “तीन दिनदेखि प्रदेश २ को अस्पतालहरूमा अक्सिजन अभाव देखिएको छ,” उनले भने, “अक्सिजन उद्योगबाट नै कम मात्रामा अक्सिजन आइरहेको छ । आएकोलाई व्यवस्थापन गर्न नसक्दासमेत अभाव देखिएको छ ।”
अक्सिजन व्यवस्थापनको जिम्मा प्रमुख जिल्ला अधिकारीलाई दिइएको छ ।
प्रादेशिक अस्पताल जनकपुरधामका मेडिकल सुपरिटेन्डेन्ट डा. प्रमोद कुमार यादवले अक्सिजन अभावले अस्पतालका बिरामी जोखिममा रहेको बताए । एक सातादेखि अस्पतालमा माग अनुसारको अक्सिजन नआएको गुनासो गर्दै सरकारी अस्पतालका लागि आएको अक्सिजन निजीमा जाने गरेको उनको दाबी छ । यादवकाअनुसार प्रादेशिक अस्पतालमा दैनिक २ सय अक्सिजनको सिलिन्डर आवश्यक पर्छ । तर, अहिले जसोतसो एक सय सिलिन्डरको आपूर्ति भइरहेको छ ।
प्रादेशिक अस्पतालमा ६० जना संक्रमितको उपचार भइरहेको छ । डा. यादवकाअनुसार १४ जना बिरामीको अवस्था गम्भीर रहेको छ । उनीहरू अक्सिजनकै भरमा बाँचिरहेको उनले बताए । दैनिक दश ओटा अक्सिजन सिलिन्डर खपत भइरहेको उनको भनाइ छ । अस्पतालमा ६ ओटा भेन्टिलेटर सञ्चालनमा रहेकोमा दुई ओटामा बिरामीको उपचार भइरहेको उनले बताए ।
निजी अस्पतालबाट बिरामीको अवस्था गम्भीर भएपछि मात्रै सरकारीमा रेफर गर्ने गलत प्रवृत्ति रहेको उनको दाबी छ । “निजी अस्पतालहरूले बिरामीलाई अचानक सरकारी अस्पतालमा रेफर गर्दिन्छ । त्यो प्रवृत्रि गलत हो । बिरामी समयमा पठाउनुपर्छ कि त पहिले अस्पताललाई जानकारी गराउनु पर्छ,” उनले भने ।
अक्सिजन आपूर्ति एवम् व्यवस्थापन समितिका सदस्य तथा धनुषाका प्रहरी नायब उपरीक्षक मकेन्द्र मिश्रले अक्सिजन अभाव देखिएपनि सबै ठाउँमा आपूर्ति भइरहेको दाबी गरे । अक्सिजन ढुवानी गर्ने सवारी सम्बन्धित अस्पतालले नपठाउँदा ढिलो भएको हुनसक्ने उनको जिकिर छ । “निजी र सरकारी भनेर काखापखा भएको छैन्,” उनले भने, “व्यवस्थापन राम्रो भइरहेको छ । अक्सिजन अभाव हुन नदिन सरोकारवालासँग छलफल भइरहेको छ ।”
अक्सिजन एकद्वारबाट वितरण
मुख्यमन्त्री लालबाबु राउतसहितको टोलीले धनुषाका अक्सिजन उद्योग र कोभिड अस्पतालहरूको स्थलगत निरीक्षण गरेको छ । आइतबार आन्तरिक मामिला तथा कानुनमन्त्री ज्ञानेन्द्रकुमार यादव, प्रमुख सचिव गोकर्णमणि दुवाडी, मुख्यन्यायधिवक्ता दिपेन्द्र झा, नेपाल प्रहरीका डीआईजी धिरज प्रताप सिंह र धनुषाका प्रमुख जिल्ला अधिकारी बन्धु प्रसाद बास्तोला सहितको टोलीले स्थलगत निरीक्षण गरेको हो ।
ढल्केवरस्थित ढल्केवर ग्यास उद्योग (अक्सिजन प्लान्ट) निरीक्षणको क्रममा मुख्यमन्त्री राउतले उद्योगका सञ्चालकलाई अक्सिजनको वितरण एकद्वारा प्रणालीमार्फत मात्र गर्न आग्रह गरे । अक्सिजनको वितरणमा आजैबाट एकद्वार प्रणाली लागु गरिएको छ ।
त्यसैगरी मुख्यमन्त्री राउतसहितको टोलीले जनकपुरधामको बेलामा निर्माणाधीन अक्सिजन प्लान्टको समेत अवलोकन गरेको छ । मुख्यमन्त्री राउतले अविलम्ब प्लान्ट सञ्चालन गरी संक्रमितहरूको ज्यानको रक्षा गर्न उद्योगका संचालकलाई आग्रह गरे । बेलास्थित निर्माणाधीन उद्योगको २४ घण्टामा ६ सय सिलिन्डिर रिफिल गर्न सक्ने क्षमताको रहेको छ ।