नयाँदिल्ली । भारतको गंगा नदी किनारमा दर्जनौँ शव भेटिएको छ । बिहार राज्यको बक्सर जिल्लास्थित नदी किनारमा कम्तीमा ४० शव भेटिएको बीबीसी हिन्दीले जनाएको छ ।

कम्तीमा ३०–४० शव भेटिएको स्थानीय विकास अधिकारी अशोक कुमारले पुष्टि गरेका छन् । घाटमा बस्नेहरुसँगको सोधपुछ पछि ती शव उत्तर प्रदेशबाट बगेर आएको अनुमान गरिएको छ ।

शवको अन्तिम संस्कारका लागि छिमेकी जिल्लाका जिल्ला अधिकारीहरुसँग समन्वय स्थापित गर्ने प्रयास भइरहेको बक्सर जिल्लाका जिल्ला अधिकारी अमन समिरले पत्रकार सम्मेलन गरी जानकारी दिएका छन् ।

तर, स्थानीय पत्रकारहरुले भने प्रशासनको दाबीलाई अस्वीकार गरेका छन् । अहिले नदीको पानीमा धार नभएकाले लास अर्को जिल्लाबाट बगेर आएको हुन नसक्ने उनीहरुको दाबी छ । “मे ९ मा मैले पहिलोपटक करिब १०० लास देखेँ । तर, मे १० मा यो संख्या घटिसकेको थियो,” स्थानीय पत्रकार सत्यप्रकाश भन्छन्, “कोरोनाका कारण अहिले बक्सरको घाटमा लास जलाउने ठाउँ छैन । त्यसैले अहिले लासहरु आठ किलोमिटर टाढाको घाटमा लगिइन्छ ।” सो घाटमा जलाउने दाउरा नहुनेलगायत विविध कारणले मानिसले नदीमा नै लास बगाइरहेको उनले बताए ।

पत्रकार सत्यप्रकाशको भनाइलाई सो घाटमा रहने पन्डित दिन दयाल पाण्डेले पनि पुष्टि गरेका छन् । पहिले दैनिक तीन-चारवटा शव आउने गरेकोमा पछिल्लो दुई हप्तादेखि औसत २० शव आइरहेको उनले बताए । “यो कोरोना संक्रमितको शव हो । लासलाई बगाउन हामीले अस्वीकार गरे पनि मानिस हाम्रो कुरा मान्दैनन्,” पाण्डेले भने ।

बक्सर प्रशासनले ती शवहरु डोजर लगाएर गाड्ने प्रक्रिया सुरु गरेको जनाइएको छ ।