काठमाडौं । नेकपा (एमाले)ले लुम्बिनी प्रदेशमा शंकर पोखरेललाई नै नयाँ सरकारको मुख्यमन्त्रीको रुपमा प्रस्ताव गर्ने भएको छ ।

आज बसेको संसदीय दलको बैठकले संविधानको धारा १६८ (१) बमोजिम दाबी पेस गर्ने र मुख्यमन्त्रीमा पोखरेललाई नै प्रस्ताव गर्ने निर्णय गरेको मुख्य सचेतक भूमिश्वर ढकालले जानकारी दिए । संविधानको उक्त धारामा भनिएको छ, “प्रदेश प्रमुखले प्रदेशसभामा बहुमतप्राप्त संसदीय दलको नेतालाई मुख्यमन्त्री नियुक्त गर्नेछ र निजको अध्यक्षतामा प्रदेश मन्त्रिपरिषद् गठन हुनेछ ।”

पोखरेलले आजै मुख्यमन्त्रीबाट राजीनामा दिएका थिए । आज नै मुख्यमन्त्रीको शपथ हुन सक्ने उनले बताए । जनता समाजवादी पार्टी (जसपा)का चार सांसद पदमुक्त भएपछि लुम्बिनी प्रदेशसभा ८१ सदस्यीय छ । जसमा सरकार बनाउनका लागि आवश्यक संख्या ४१ हो । ४१ एमाले एक्लैको छ ।