बीबीसी । स्कटिस वैज्ञानिकहरुले मान्छेबाट बिरालोमा कोभिड–१९ सरेका घटनाबारे अध्ययन गरि जीव–मानव बीचको संक्रमणमा थप प्रमाण फेला पारेका छन् । युनिभर्सिटी अफ ग्लासगोका अनुसन्धानकर्ताका अनुसार कोरोना लागेका बिरालो सामान्य लक्षण देखाउने देखि गम्भीर बिरामी समेत पर्न सक्छन् । 

विश्वभर वैज्ञानिकहरु अहिले घरपालुवा जीवजन्तुबाट मान्छेमा कोरोना फैलन सक्छ सक्दैन भन्ने विषयमा स्पष्ट हुनमा लागिरहेका छन् । उनीहरुले फेला पारेका दुई संक्रमित बिरोलालाई तिनकै घरमालिकबाट कोरोना सरेको थियो । 

‘भेटेरीनरी रेकर्ड’ मा प्रकाशित यस अध्ययनका अनुसार अहिलेसम्म बिरालो, या कुकुरबाट मान्छेमा कोरोना भएको चाहिँ कुनै स्पष्ट प्रमाण छैन । तरपनि घरपालुवा जीवजन्तुहरु भाइस जम्मा हुने ठाउँ बन्न सक्नेमा वैज्ञानिकहरुले धेरैपटक चिन्ता जनाइसकेका छन् जसले संक्रमण फैलाउन सक्छ । यसकारण पनि मान्छेलाई संक्रमित गर्नमा जीवजन्तुले केकस्तो भूमिका खेल्न सक्लान् भनेर बुझ्न महत्वपूर्ण रहेको उनीहरुले बताए । 

तुलनात्मक रुपमा कम जोखिम 

अध्ययनका प्रमुख नेतृत्वकर्ता एवम् भाइरस रिसर्चकी प्रोफेसर मार्गरेट होजी भन्छिन्, “हालसम्म जीवजन्तुबाट मान्छेमा संक्रमण हुने सम्भावना तुलनात्मक रुपमा एकदम कम छ । अहिले मान्छे मान्छेबीचको संक्रमण दर अति उच्च छ । तर मान्छेमा रोग कम हुँदै जाँदा जीवजन्तुहरुले भाइरसको अर्को श्रोतका रुपमा मान्छेमा पुनः संक्रमण फैलाउन सक्नेबारे बुझ्न एकदम जरुरी छ । ”

गम्भीर बिरामी परेको बिरालोको ‘पोस्ट मोर्टम लङ्स स्याम्पल’ हेर्दा फोक्सोमा धेरै क्षति पुगेको अनि भाइरल न्युमोनिया सहित सार्स–कोभी–२ संक्रमणको प्रमाण देखिएको हो । जीवजन्तुहरुमा परीक्षण सिमित हुने हुनाले पनि यस्ता घटना विश्वभर अज्ञात रुपमा रहेको हुन सक्ने उनीहरुले बताए । 

महामारी सुरु भएपछि देखि हङकङ, अमेरिका, बेल्जियम, फ्रान्स लगायत देशहरुमा बिरालो र कुकुर कोभिड–पोजेटिभ भएकाबारे थुप्रै खबर आएका थिए जो पनि घरमालिकबाटै संक्रमित भएको आशंका गरिएको थियो । त्यसकारण यो नयाँ अध्ययनले यस विषयमा थप गम्भीर विश्लेषण प्रदान गर्न सक्ने क्याम्ब्रिज युनिभर्सिटीका प्रोफेसर जेम्स वुड बताउँछन् ।

उनले भने, “कुकुर र बिरालो संक्रमित भएकाबारे पहिले पनि खबर आएका छन् र यो खोज वास्तवमै उच्च गुणस्तरको छ जसले के कसरी संक्रमित भएको भन्ने पूरै ‘जेनोम सिक्वेन्स’ पनि समावेश गरेको छ । यस खोजलाई वेल्कम आइएसएसएफ कोभिड रेस्पन्स फन्डले आर्थिक सहायता प्रदान गरेको थियो र मेडिकल रिसर्च काउन्सिलले पनि समर्थन गरेको छ ।