वासिङ्टन । जलवायु संकटको सामना गर्न अमेरिकाले यो दशकको अन्त्यसम्ममा कार्बन उत्सर्जन कम्तीमा आधा घटाउने प्रतिबद्धता गरेको छ । अमेरिकी राष्ट्रपति जो बाइडेनले सन् २०३० सम्ममा कार्बन उत्सर्जन कम्तीमा ५० प्रतिशतले कम गर्ने प्रतिबद्धता व्यक्त गरेका द गार्जियनले जनाएको छ ।
दर्जन बढी देशका प्रतिनिधिहरूको जलवायु सम्बन्धी भर्चुअल सम्मेलनअघि राष्ट्रपति बाइडेनले महत्वकांक्षी लक्ष्य सार्वजनिक गरेका हुन् । यद्यपि यो लक्ष्य संयुक्त राष्ट्रसंघमा औपचारिक रूपमा पेश हुन भने बाँकी नै छ ।
बाइडेनको यो घोषणाले जलवायुको मुद्दालाई अमेरिकाले पुनः महत्वका साथ उठान गरेको सन्देश प्रसार भएको ह्वाइट हाउसका एक प्रवक्ताले प्रतिक्रिया दिएका छन् । यसअघिका राष्ट्रपति डोनाल्ड ट्रम्पले जलवायु परिवर्तनको मुद्दालाई पूर्णतया बेवास्ता गर्दै पेरिस जलवायु सम्झौताबाट बाहिरिएका थिए ।
ट्रम्पको कार्यकालमा अमेरिका उक्त सम्झौताबाट बाहिरिएपछि बाइडेन अन्तर्राष्ट्रिय विश्वसनीयता हासिल गर्न आतुर थिए । उनको यो घोषणाले धेरै कार्बन उत्सर्जन गर्ने देशहरूलाई पनि यस्तै कदम चाल्न दबाब दिने बताइएको छ ।