नयाँ दिल्ली । कोरोना भाइरसको संक्रमण तिब्र रुपमा बढेपछि भारतको महाराष्ट्र राज्यमा आइतबारदेखि रात्रीकालिन कफ्र्यु घोषणा गरिएको छ । भारतको आर्थिक राजधानी मुम्बईमा बितेको २४ घण्टामा हालसम्मकै धेरै ६ हजार एकसय २३ संक्रमित भेटिएपछि यस्तो निर्णय आएको हो ।
कम्तिमा अप्रिल १५ सम्म जारी रहने यो नियम रातको ८ बजेदेखि बिहानको ७ बजेसम्म लागू हुनेछ ।
उक्त समयमा बगैंचा, समुन्द्रि किनारलगायतका सर्वजनिक स्थलमा पाँच जनाभन्दा बढी मानिस भेला हुन समेत रोक लगाइएको हिन्दुस्तान टाइम्सले जनाएको छ ।
यो नियम होटल, पब, रेष्टुरेन्ट, सिनेमा हल र सपिङ मलमा समेत लागू हुने मुम्बइका मेयर किशोर पेडनेकरलाई उदृत गर्दै समाचार संस्था रोयटर्सले जनाएको छ । नियम उल्लंघन गर्नेलाई १००० भारतीय रुपैयाँ जरिवाना गरिने समाचारमा जनाइएको छ ।
भारतमा हिजो शनिबार मात्र ६२ हजार ७ सय १४ जनामा संक्रमण पुष्टि भएको थियो । दैनिक संक्रमितको यो संख्या नोभेम्बरयताकै धेरै हो । मुम्बई शहरका धेरै सरकारी अस्पतालमा क्रिटिकल केयर शैयाको समेत अभाव भएको बताइएको छ ।
भारतको थोरै जनसंख्याले मात्र कोभिड खोप प्राप्त गर्दा मोदी सरकारको खोप निर्यात अभियानका विषयमा असन्तुष्टिहरु बढ्न थालेको छ । भारतले अनुदान र व्यापारिक हिसाबले हालसम्म ७७ देशमा ६ करोड १० लाख डोज खोप निर्यात गरेको छ । यद्यपी भारतमा हालसम्म कुल जनसंख्याको ४ प्रतिशत ले मात्र खोप प्राप्त गरेका विज्ञहरुले बताएका छन् ।