चितवन । नेपाली कांग्रेसका वरिष्ठ नेता रामचन्द्र पौडेलले अहिलेको अवस्थामा नेपाली कांग्रेस केपी शर्मा ओलीसँग मिलेर सरकारमा जान नसक्ने बताएका छन् ।
आज बिहान भरतपुरमा आयोजित पत्रकार सम्मेलनमा पौडेलले ओलीलाई सहयोग गर्नु कांग्रेसको नैतिकताबाहिरको कुरा भएको बताए । उनले प्रचण्ड– नेपाल समूहसँग मिल्न सकिने संकेत पनि गरे । “यस्तो बेलामा केपी ओलीलाई सपोर्ट गर्नु कांग्रेसको नैतिकताले दिँदैन । प्रचण्ड र माधवको विषयमा पोजिटिभली हुन सकिन्छ । यसमा पोजिटिभली छलफल हुन्छ,” उनले भने ।
प्रचण्डले यसअघि धोका दिएको जिज्ञासाको जवाफ दिँदै उनले राजनीतिमा कसले कतिखेर धोका दिने भन्ने विषय नौलो नभएको आशय व्यक्त गरे । ओलीबाहेकका पार्टीसँग मिलेर अहिलेको देशको संकट टार्नुपर्ने उनको भनाइ थियो । उनले भने, “अहिलेको आवश्यकता के हो, त्यहीअनुसार अघि बढ्नुपर्दछ ।”
देश यथास्थितिमा नरहने भन्दै उनले आन्तरिक रूपमा पार्टीभित्र सरकारमा जाने/नजाने विषयमा छलफल भइरहेको बताए । उनले अहिलेसम्म नेपाल प्रयोगको थलो मात्र भएको बताउँदै आफ्नो भूमिका व्यवस्थालाई बचाउनकेन्द्रित हुने उल्लेख गरे ।
