काठमाडौं । गृहमन्त्री रामबहादुर थापा ‘बादल’ले नेत्रविक्रम चन्द ‘विप्लव’ नेतृत्वको समूहसँगको वार्ताबाट छिट्टै सुखद् परिणाम आउने बताएका छन् । आफ्नो फेसबुक पेजमार्फत गृहमन्त्री थापाले यस्तो जानकारी दिएका हुन् ।
आज बिहान बालुवाटारमा गृहमन्त्री थापाको नेतृत्वमा रहेको सरकारी टोली र विप्लव समूहका नेता खड्गबहादुर विश्वकर्मा ‘प्रकाण्ड’को टोलीबीच पहिलो चरणको वार्ता भएको थियो ।
सोही वार्ताको विषयलाई लिएर गृहमन्त्री थापाले लेखेका छन्, “मेरो नेतृत्वमा रहेको नेपाल सरकारको वार्ता टोली र विप्लव नेतृत्वको नेकपाको प्रकाण्डको नेतृत्वमा रहेको वार्ता टोलीबीच आज भएको पहिलो चरणको वार्ता सकारात्मक दिशातर्फ उन्मुख छ । धेरै सैद्धान्तिक र प्राविधिक विषय सहमतिनजिक छ । केही विषयमा छलफल जारी छ । छिट्टै सुखद् परिणाम आउने अपेक्षा छ ।”
सरकारले ०७५ फागुन २८ गते विप्लव समूहमाथि प्रतिबन्ध लगाएको थियो ।