वेलिङटन । न्युजिल्यान्डको प्रमुख शहर अकल्यान्डका मेयरले यस महिनाको दोस्रो लकडाउन सुरु हुँदै गर्दा आफ्नो शहरका नागरिकलाई कोभिड विरुद्धको खोप लगाउनमा प्राथमिकता दिन अपिल गरेका छन् । 

२० लाख मानिसहरु बसोबास गर्ने यस शहरमा एक स्थानीय संक्रमित फेला परेपछि प्रधानमन्त्री ज्याकिन्डा एडर्नले यसअघि सात दिनको लकडाउन घोषणा गरेकी हुन् । कोरोना महामारीको अवधिभरि एडर्नले ‘चाँडो र कडा’ कदम उठाउने नीति अपनाउँदै आएकी छन् ।

न्युजिल्यान्डको यही प्रतिक्रियाले कोरोना नियन्त्रणमा यस देशलाई विश्वकै सबैभन्दा सफल तुल्याएको पनि बताइने गरिएको छ ।

तर हालै जारी गरिएको यो नयाँ लकडाउन चाहिँ सामाजिक संजालमा धेरै आलोचित भइरहेको छ । यसले नागरिकहरुको धैर्यताको परीक्षण लिइरहेको बताइएको छ । 

मेयर फिल गोफका अनुसार तेस्रो स्तरको लकडाउन जारी गराउँदा शहरमा प्रति दिन २०० बढीको जागिर जाने गरेको छ भने हरेक दिन झन्डै २ करोड १७ लाख डलर बराबर नोक्सान हुने गर्दछ । 

आफ्नो बयानमा उनले भने, “देशको खोप कार्यक्रममा अहिले  अकल्यान्डलाई प्राथमिकता दिन जरुरी छ । अनि मात्र भविष्यमा यस किसिमका लकडाउनबाट जोगिन सकिनेछ । त्यस्तै नागरिकहरुको रोजगारी, आयश्रोत बचाउन अनि राष्ट्रिय अर्थतन्त्र पुनःस्थापनाको काममा अकल्यान्डको भूमिका सुनिश्चित गर्नका लागि पनि हामीलाई खोप आवश्यक छ ।”

एकै महिनामा दुईपटक जारी गरिएको लकडाउनका कारण शहरका केही प्रमुख खेलकुद एवम् सांस्कृतिक कार्यक्रम पनि रद्द गराउनु परेको थियो । त्यस्तै लकडाउनको घोषणापछि मानिसहरुमा चहलपहल बढ्दा ट्राफिकको समस्या पनि अधिक बढ्न पुगेको बताइएको छ । 

एक संक्रमित व्यक्ति कोरोना लागेको एक हप्तासम्म बाहिर खुलेर हिँडडुल गरिरहेको पाइएपछि नै समुदायमा फैलने त्रास बढेको हो । 

त्यसपछि आइतबार दुई अन्य स्थानीय संक्रमण पनि फेला परेका हुन् । सोमबार भने नयाँ बिरामीबारे कुनै खबर गरिएको छैन । 

प्रधानमन्त्री एडर्नले सोमबार बताए अनुसार लकडाउन गर्न बाध्य बनाउने पहिलो संक्रमितले धेरै गलतीहरु गरेका थिए ।

खबरका अनुसार ती व्यक्ति एक संक्रमित परिवारसँग सम्पर्कमा आएका थिए र कोरोना परीक्षण गराइसकेपछि पनि विभिन्न सार्वजानिक स्थलहरु भ्रमण गरेका थिए । 

एडर्नले भनिन्, “यसले अत्यन्तै भयानक परिणाम निम्त्यायो त्यसमा कुनै शंका छैन ।” 

ती व्यक्तिलाई केकस्तो सजायँ दिने भन्ने चाहिँ पुलिसको हातमा रहेको पनि उनले बताइन् । प्यान्डेमिक सुरु भएदेखि न्युजिल्यान्डमा २ हजार संक्रमित फेला परेका छन् जसमा २६ जनाको यसका कारण मृत्यु भएको छ । – रोयटर्सबाट