काठमाडौं । काठमाडौं महानगरपालिकाले कर्मचारी समायोजन ऐन २०७७ जारी गर्दै १८ सय स्थायी कमर्चारीलाई एक-एक तह बढुवा गरेको छ । महानगरले स्थायी दरबन्दीका कर्मचारीको एकएक तह बढुवा गरेको हो ।
काठमाडौं महानगरपालिका प्रमुख प्रशासकीय अधिकृत राजेश्वर ज्ञवालीले नगरसभाको बैठकले सो ऐन पारित गरेलगत्तै कर्मचारी एकएक तह बढुवा भएको बताए ।
‘‘संघबाट पाँच वर्ष सेवा अवधि पूरा गरेका शाखा अधिकृत महानगरमा आठौँ, ५ वर्ष सेवा अवधि नपुगेका उपसचिव नवौं र ५ वर्षभन्दा बढी अवधि पार गरेका कर्मचारी दशौं तहमा कार्यरत छन्,” उनले भने, ‘‘महानगरमा बीस वर्षअघि भर्ना भएका कर्मचारीहरु अहिले पनि आठौं तहमा कार्यरत हुँदा महानगरले असन्तुष्टि जनाउँदै आएको थियो । यसरी कर्मचारी बढुवा हुँदा कर्मचारीको तलब पनि स्वतः बढेको छ । महानगरलाई महिनामा ३० लाख रुपैयाँ थप वित्तीय भार थपिएको छ । कर्मचारी समायोजनले वर्षमा करिब ३० करोड ६० लाख रुपैयाँ अतिरिक्त भार थपिएको छ ।”