काठमाडौं । पशुपतिनाथको राममन्दिरको पुरातात्विक महत्वको आधुनिक भवन निर्माण अन्तिम चरणमा पुगेको छ । राममन्दिरका भागवानन्द आश्रमका आचार्य दुर्गाप्रसाद पौडेलले पुरातात्विक महत्त्वको १७ कोठाको भवनमा एउटा ठूलो र मिनिहल निर्माण अन्तिम चरणमा पुगेको बताए ।
 
उनले भने, ‘‘२०४४ सालदेखि नित्य अखण्ड महायज्ञ र रुद्राभिषेक भइरहेको थियो । भागवतानन्द सन्यास आश्रम एवं गुरुकुलका पीठाधीश भागवतानन्द गिरीका चेलाको सात करोड सहयोगमा प्राचीन शैलीको भवन निर्माण अन्तिम चरणमा पुगेको छ । आश्रममा गाई, ब्राह्मण, अतिथि र दरिद्र नारायणको समेत सेवा हुने गरेको छ ।”  

भवन निर्माण सम्पन्न भएपछि १०० ब्राह्मण वटुकलाई राखी नित्य अखण्ड महायज्ञ, हवन र रुद्राभिषेक गरिनेछ । हाल भवन निर्माण भइरहेकाले ३० ब्राह्मणले यज्ञ गरिरहेका छन् ।