काठमाडौं । काठमाडौंको आजको न्यूनतम तापक्रम २.६ डिग्री सेल्सियस रहेको छ । विहान साढे ६ बजे काठमाडौंको न्यूनतम तापक्रम २.६ डिग्री सेल्सियस मापन गरिएको हो । आइतबार बाठमाडौंको तापक्रम १.८ डिग्री सेल्यिस थियो ।
आज दिउँसो काठमाडौंको तापक्रम १७–१९ डिग्री सेल्सियस रहने छ । मौसमविद् मञ्जु वासीका अनुसार दिउँसो काठमाडौंको मौसम सफा रहने छ । 

तराईका अधिकांश जिल्लामा बाक्लो हुस्सु र कुहिरो लागिरहेको छ । अधिकांश जिल्लामा अपराह्नदेखि दिउँसो २ बजेसम्म हुस्सु हटे पनि केही जिल्लामा भने साँझसम्म रहने सम्भावना रहेको छ । 

तराईमा बाक्लो हुस्सु लागेका कारण सवारी साधान सञ्चालनमा कठिनाइ हुँदै आएको छ । कतिपय विमानस्थलमा न्यून भिजिविलिटीका कारण हवाई यातायातसेवा समेत प्रभावित हुँदै आएको छ । २५ सय मिटरभन्दा कम भिजिविलिटी भएको अवस्थामा विमान उडान तथा अवतरणमा अवरोध आउँछ । 

आज दिउँसो प्रदेश न. १ को पहाडी भू–भागमा आंशिक बदली रहने र बाँकी भू–भागमा मौसम सामान्यतया सफा रहनेछ । जल तथा मौसम विज्ञान विभागका अनुसार प्रदेश १ को उच्च पहाडी तथा हिमाली भू–भागका एक÷दुई स्थानमा हल्का हिमपाको संभावना रहेको छ ।  

यसैबीच, अझै केही दिन पानी पर्ने सम्भावना नरहेको मौसमविद् मञ्जुको भनाइ छ । “हामीले सामान्यतया तीन दिनको मौसमी प्रणाली हेर्छौं । तीनदिनको मौसमी प्रणाली अनुसार पानी पर्ने सम्भावना देखिएको छैन,” उनी भन्छिन् । 
पानी पार्ने तहको मौसमी प्रणाली नेपाल नभित्रिएको उनी बताउँछिन् । 

पश्चिमी वायुको प्रभाव कम भएका कारण यो वर्ष अहिलेसम्म पानी परेको छैन र जाडो पनि कम भएको छैन । “पश्चिमी वायुको प्रभावले हिउँदमा जति पानी पर्नुपर्ने थियो, परेको छैन । पानी नपरेका कारण राजस्थान तथा पश्चिमबाट आउने वायुमा चिसोको मात्रा बढेर आइरहेको छ । त्यसैले चिसो बढिरहेको छ,” मौसमविद् मीन अर्याल भन्छन्, “पानी परेको भए पश्चिमी वायुमा चिसोको मात्रा कम हुन्थ्यो । र, वायुमण्डल पनि सफा भएर सूर्यको किरण पृथ्वीमा राम्रोसँग आउन पाउँथ्यो ।”