काठमाडौं । विदूषक भनेको नाटकको हास्य पात्र । तर जब हामी कसैलाई विदूषक भन्छौं त्यसबेला उ केवल हास्य पात्र नभएर अरुलाई गाली गर्ने, सताउने वा काम बिगार्ने व्यक्ति भनेर पनि बुझिन्छ ।
कतिपय देशमा हास्य कलाकार राजनीतिमा लागेर एक सफल सरकार प्रमुख भएको उदाहरण छन् । नेपालमा पनि धेरै हास्य कलाकारलाई राजनीतिमा प्रवेश गरेर देश सुधार्नका लागि धेरैले आग्रह गरिरहेका हुन्छन् । तर, जब एक राजनीतिज्ञ आफ्ना गल्ती, कमजोरी र प्रतिगमनकारी प्रवृत्तिलाई लुकाउन विदूषकको भूमिका खेल्न खोज्छन् अनि बिद्रुप राजनीतिको विकृत नमूना देखिन्छ । अहिले नेपालमा त्यस्तै एक बिद्रुप राजनीतिको मञ्चन भइरहेको छ । आजको प्रतिवाद कार्यक्रम त्यही ‘डार्क कमेडी’ अर्थात् अँध्यारो प्रहसनमा केन्द्रित छ ।
नेटफ्लिक्समा एउटा डार्क कमेडी सिरिज छ– हंसमुख । यो सिरिजमा एउटा कमेडियन कसैको हत्या नगरिकन स्टेजमा मान्छेलाई हसाउनै सक्दैन । उसको सहयोगीले हरेक शोभन्दा अगाडि कुनै न कुनै मान्छे खोज्छ र त्यसको हत्या गरेपछि नायक स्टेजमा प्रवेश गर्छन् र उनी सबैले ताली पिट्नेगरी स्टेज शो गर्न समर्थ हुन्छन् । हाम्रो देशका नायकले पनि आफ्नो सहयोगीको आडमा अहिले संविधानको हत्या गरेका छन् र स्टेजमा बडो राम्रो प्रदर्शन गर्दैछन् ।
हेरौँ, यसै विषयमा केन्द्रित रहेर तयार पारिएको कार्यक्रम प्रतिवाद
