एजेन्सी । सर्वत्र खोप अभियान सुरु भएको एक हप्तामा लाखौँ डोजहरु अस्पताल लगायत अन्य ठाउँहरुमा प्रयोगविहिन भएर बसेपछि यस महिना २ करोड मानिसलाई खोप लगाउने अमेरिकी सरकारको लक्ष्य पूरा हुनेमा शंका व्यक्त गरिएको छ । 

बुधबार बिहानसम्म गत हप्ता वितरण गरिएको फाइजर खोपको एक तिहाइ मात्र सुइ लगाइएको बताइएको छ । अमेरिकी रोग नियन्त्रण तथा रोकथाम केन्द्रका अनुसार अहिले मोडेर्ना कम्पनीसहितको गरि कोरोना विरुद्धका ९५ लाख डोज विभिन्न स्टेटहरुमा पठाइएको छ । र अस्पतालहरुले मोडेर्नाको खोप पनि लगाउन सुरु गरिसकेका छन् तर २९ लाख खोप प्राप्त गरिसकेपनि पहिलो हप्ताभरमा ६ लाख बढी खोप मात्र दिइएको छ । 

अस्पतालहरुले बताएअनुसार गत सोमबार सुरु भएको कोभिड विरुद्धको खोप अभियानमा फ्रोजन अवस्थामा रहेका डोजहरुलाई प्रयोगमा ल्याउने तयारी अझै जारी छ जसमा खोप लगाउने क्लिनिकहरुमा खटाउन कामदारहरु पनि खोजी भइरहेको छ भने कार्यक्रम अन्र्तगत सबै मानिसहरुबीच समाजिक दुरी कायम हुने पनि सुनिश्चित गरिराखिएको छ । 

यिनै कारणले पनि खोप कार्यक्रम एकदमै सुस्त गतिमा अघि बढिरहेको बताइएको छ । धेरै त्यस्ता क्लिनिकहरुले पहिलो दिनमा केबल १०० जनालाई मात्र खोप लगाएको बताएका हुन् । अर्कोतर्फ अमेरिकामै संक्रमण लगातार बढ्ने क्रम रोकिएको छैन जहाँ मृत्युदर र बिरामीको सङ्ख्या विश्वकै सबैभन्दा उच्च रहेको छ । 

यसअघि ट्रम्प प्रशासनले वर्षको अन्त्यसम्ममा २ करोड मानिसहरुलाई खोप लगाउने वचन दिएको थियो ।  तर अब यसका लागि केबल ९ दिन मात्र रहेको छ जसबीच झन्डै १ करोड ९० लाख सुइ लगाउनुपर्ने हुन्छ र यसमा क्रिस्मस अनि नयाँ वर्षको छुट्टी पनि पर्दछ ।  ‘युएस अपरेसन र्याप स्पिड’ का प्रमुख सल्लाहकार मोनसेफले बुधबारको प्रेस सम्मेलनमा भनेका छन्, “मानिसहरुको हातमा सुइ लगाइदिने काम हामीले सोचेभन्दा धेरै नै सुस्त गतिमा भइरहेको छ । ”

आगामी फेब्रुअरीमा अन्य दुई खोप : जोन्सन एण्ड जोन्सन र एस्ट्राजेनेका पनि स्वीकृत हुने अपेक्षा रहेको छ ।  सरकारको अहिलेसम्मको लक्ष्य चाहिँ मार्च १ सम्म फाइजर र मोडेर्नाका १० करोड सुइ मानिसहरुलाई लगाउनु रहेको छ ।  यस्तोमा खोप वितरणको जिम्मा लिएका जेनेरल गस्तेभ पर्नाले सोमबार मात्र यो काममा ढिलाइ भइरहेको स्वीकार गरि आफ्नो गति बढाउँदै लैजाने भनेका हुन् ।