एजेन्सी । शनिबार र आइतबार भारतको आन्ध्र प्रदेशमा एकैपटक सयौँ मानिसहरु रहस्यमयी तरिकाले बिरामी भइ ५०० भन्दा बढीलाई अस्पताल भर्ना गराउनु परेपछि भारतीय स्वास्थ्य अधिकारीहरुले घटनाको अनुसन्धान सुरु गरेका हुन् । र यसैको नतिजाले ती बिरामीहरुको रगतमा ‘लिड र निकेल’ धातु रहेको देखाएको छ ।
यसमा बिरामीहरुले वाकवाकी लाग्ने, आँखामा समस्यादेखि दिमागी झट्का र बेहोस हुनेसम्मका विभिन्न लक्षण देखाएका थिए । प्रदेशका मुख्य मन्त्रीले बताएअनुसार ‘अल इन्डिया इन्स्टिच्युट अफ मेडिकल साइन्सेस, एम्स’ ले सञ्चालन गरेको अनुसन्धानको प्रारम्भिक नतिजामा बिरामीहरुको रगत स्याम्पलमा लिड र निकेलको निशान फेला परेको छ ।
यसै सम्बन्धी ‘इन्डियन इन्स्टिच्युट अफ केमिकल टेक्नोलोजी’, आइआइसीटीले पनि विभिन्न अध्ययन एवम् परीक्षण गरिरहेको छ जसको रिपोर्ट अहिले प्राप्त भइसकेको छैन । दिल्लीस्थित एम्स टोलीले १०० भन्दा धेरै रगतका स्याम्पलहरु परीक्षण गरेको थियो जसमा ती धातुहरु भेटिएको हो । थप २१ स्याम्पल अहिले फेरि दिल्ली लगिएको छ भने दूधको स्याम्पल पनि परीक्षण भइरहेको छ ।
यसअघि एम्सले त्यस क्षेत्रको पानीको पनि परीक्षण गरेको थियो तर त्यसमा चाहिँ कुनै बाहिरी पदार्थ नभेटिएको बताएको छ । अहिलेसम्म यो रहस्यमयी स्वास्थ्य समस्याका कारण ५०५ बिरामी अस्पताल भर्ना भएको, ३०० जना डिस्चार्ज भइसकेको र एकको मृत्यु भएको बताइएको छ । कोभिड महामारीका कारण पहिले नै अस्पतालहरु ठूलो भार परिरहेका बेलामा यो नयाँ समस्याले थप चुनौती उत्पन्न गराएको छ । सीएनएन