काठमाडौ । देशका विभिन्न क्षेत्रमा उल्लेखनीय योगदान गरेका १० जना प्रबुद्ध नागरिकले सरकारलाई ‘‘भ्याक्सिन छनोट र आयातदेखि वितरणको प्राथमिकता निर्धारणसम्म गर्दा पारदर्शी विधि र प्रक्रिया अपनाउन तथा त्यसका लागि समयमै उचित गृहकार्य गर्न’’ आग्रह गरेका छन् ।
उनीहरूले मंगलवार प्रेस विज्ञप्ति जारी गर्दै ‘‘राज्यका लागि ठूलो आर्थिक र व्यवस्थापकीय भार पर्ने यो काम सामयिक, चुस्त र प्रभावकारी हुन सके हामीले पनि छिट्टै यो महामारीको संकटबाट पार पाउन सक्ने’’ आशा प्रकट गरेका छन् ।
विज्ञप्तिमा ‘‘महामारी नियन्त्रणको प्रारम्भिक चरणमा झैं अब पनि अव्यवस्था र अनियमितताहरु भए भने त्यसले यो संकटलाई झनै लामो बनाउन सक्ने’’ आशंका पनि प्रकट गरिएको छ ।
विज्ञप्ति जारी गर्ने प्रबुद्ध नागरिकहरूमा पूर्वप्रधान न्यायाधीश सुशिला कार्की, पूर्व उपकुललपतिहरू महेशकुमार उपाध्याय, डा. सुरेशराज शर्मा र केदार भक्त माथेमा, पूर्वमन्त्री विद्याधर मल्लिक, शिक्षाविद् नोबेलकिशोर राई, पूर्व मुख्यसचिव विमल कोइराला, पूर्व प्रदेश प्रमुख अनुराधा कोइराला र राष्ट्रिय मानअधिकार आयोगकी पूर्व सदस्य मोहना अन्सारी तथा पूर्व नायब प्रहरी महानिरीक्षक रमेश खरेल रहेका छन् ।
प्रेस विज्ञप्तिको पूर्णपाठ
विश्वव्यापी कोभिड–१९ महामारीले सिर्जना गरेको चौतर्फी संकट र निराशाबीच पछिल्लो समय भ्याक्सिन विकास, परीक्षण र वितरणसम्मका समाचारहरु आइरहेका छन् । यससँगै महामारीबाट मुक्ति पाउन सकिने आशा जागेको छ ।
नेपालले आफैं भ्याक्सिन विकास नगरेकाले हामीकहाँ भ्याक्सिन खरीद, आयात र वितरणको विषय अहिले महत्वपुर्ण बनेको छ । राज्यका लागि ठूलो आर्थिक र व्यवस्थापकीय भार पर्ने यो काम सामयिक, चुस्त र प्रभावकारी हुन सके हामीले पनि छिट्टै यो महामारीको संकटबाट पार पाउन सक्ने छौं । अर्कोतिर महामारी नियन्त्रणको प्रारम्भिक चरणमा झैं अब पनि अव्यवस्था र अनियमितताहरु भए भने त्यसले यो संकटलाई झनै लामो बनाउन सक्नेछ ।
त्यसैले भ्याक्सिन छनोट र आयातदेखि वितरणको प्राथमिकता निर्धारणसम्म गर्दा पारदर्शी विधि र प्रक्र्रिया अपनाउन तथा त्यसका लागि समयमै उचित गृहकार्य गर्न सरकारलाई अपिल गर्दर्छौं । त्यसो गर्न सके महामारी नियन्त्रणमा बल पुग्ने मात्रै हैन सरकारको आफ्नै विश्वसनीयता बढ्नेछ ।
सुशिला कार्की
महेशकुमार उपाध्याय
सुरेशराज शर्मा
विद्याधर मलिक
अनुराधा कोइराला
विमल कोइराला
नोवेलकिशोर राई
मोहना अनसारी
रमेश खरेल
केदार भक्त माथेमा