वाशिङ्टन । अमेरिकी राष्ट्रपति डोनाल्ड ट्रम्पको दाबीलाई लक्षित गर्दै सामाजिक सञ्जाल प्लेटफर्म फेसबुक र ट्विटरले चेतावनी दिएका छन् । राष्ट्रपति ट्रम्पले यसअघि डेमोक्रेटहरुले जितका लागि धाँधली गरिरहेको आरोप लगाउँदै आफ्नो जित निश्चित भएको दाबी गरेका थिए ।
मंगलबार राति राष्ट्रपति ट्रम्पले 'एक ठूलो जित ' भन्दै सामाजिक सञ्जालमा पोस्ट गरेका थिए । उक्त पोस्ट लगत्तै सामाजिक सञ्जाल फेसबुकले एक सन्देश दिँदे निर्वाचनको मतगणना जारी रहेकोले अहिले जित कसैको पनि निश्चित नभएको जनाएको छ ।
फेसबुकले लेखेको छ, "मतगणना चलिरहेको छ । अहिलेसम्म राष्ट्रपतिमा को निर्वाचित भयो भन्ने निश्चित भइसकेको छैन । भोटिङ इन्फरमेसन सेन्टरको पेजलाई लिंक गरेर फेसबुकले यस्तो चेतावनी दिएको हो ।
त्यसैगरी डेमोक्रेटहरुले चुनावमा धाँधली गरेको भन्ने पोस्टमा समेत फेसबुकले चेतावनी सन्देश पोस्ट गरेको छ ।
फेसबुकले लेखेको छ, "राष्ट्रपति ट्रम्पले निर्वाचनमा विजयी भएको अपरिपक्व दाबी गरिरहनु भएको छ । हामीले फेसबुक र इन्स्टाग्राममा नोटिफिकेसन दिन सुरु गरेका छौं । मतगणना भइरहेको छ । विजयी को हुन्छ भनेर घोषणा अहिलेनै गर्न सकिन्न । हामी दुबै उमेदवारका सामाजिक सञ्जालका सूचनालाई हेरिरहेका छौं ।"
ट्रम्पले ट्विटरमा पनि यही पोस्ट गरेका छन् । ट्विटरले पनि चेतावनी दिँदै भनेको छ, " यो निर्णय विवादस्पद छ र चुनाव वा अन्य नागरिक प्रक्रियाको बारेमा भ्रामक हुन सक्छ ।" - हफपोस्ट
.png)
