वाशिङ्टन । आज आगामी चार वर्ष अमेरिकाको भविष्य कस्तो बनाउने भन्ने कुराको फैसला गर्न अमेरिकी मतदाताहरुले मतदान गरिरहेका छन् । रिपब्लिन उमेदवार डोनाल्ड ट्रम्प र डेमोक्रेट उमेदवार जो बाइडेनमध्ये एकजनालाई आगामी चार वर्षका लागि अमेरिकाको राष्ट्रपतिको रुपमा चयन गर्ने भएका छन् ।
यसअघि गरिएका मत सर्वेक्षणका नतिजा अनुसार जो बाइडेनले अग्रता लिएका थिए । तर, मत परिणाम आएपछि मात्रै अमेरिकी नागरिकले कसलाई अवसर दिनेछन् भन्ने कुरा थाहा हुन्छ । निर्वाचनको दिन उमेदवार र समर्थकलाई साँच्चिकै एक व्यग्र प्रतिक्षाको क्षण हुने गर्दछ । जब मतदान सकिन्छ तब वास्तविक पर्खाइ सुरु हुन्छ ।
निर्वाचनको मुख्य दिन मंगलबार राष्ट्रपति ट्रम्पले व्हाइट हाउसमै समय बिताउने भएका छन् । उनले केही न्युज च्यानललाई अन्तर्वार्ता दिनुका साथै केबल टिलिभिजमा आएका समाचारहरु हेर्ने छन् ।
उनले उनको एक मनपर्ने टीभी न्युज सो फक्स एन्ड फ्रेन्डलाई फोनमार्फत नै अन्तर्वार्ता दिने कार्यक्रम रहेको जनाइएको छ । उनलाई शारीरिकरुपमा आजको दिन आरामको दिन भए पनि मानसिक रुपमा भने निकै ठूलो पर्खाइको समय हुनेछ । उनले यसअघि तीन दिनमा १४ वटा र्यालीहरुलाई सम्बोधन गरेका छन् ।
उनले उपराष्ट्रपति माइक पेन्स र उनका परीवारका साथमा नै मतपरिणामको पर्खाइमा रहनेछन् ।
त्यसैगरी राष्ट्पति पदका डेमोक्रेट उमेदावार जो बाइडेनले मुख्य निर्णायक राज्य पेन्सलभानियाका असन्तुष्ट मतदाताहरुलाई रिझाएर आफ्नो पक्षमा मतदान गर्न लगाउने रणनीतिमा व्यस्त रहनेछन् । पूर्व उपराष्ट्रपतिसमेत रहेका बाइडेनले आफ्नो बाल्यकालको बिताएको गृहनगर स्क्रान्टन र फिलाडेल्फियामा मतदाता परिचालन कार्यक्रम गर्नेछन् ।
त्यसपछि उनी डेलावरस्थित अहिलेको घरमा पुगेर मतपरिणामको पर्खाइमा हुनेछन् ।
मंगलबारपछि बाइडेनले विलमिङटनबाट आफ्नो अभिव्यक्ति सार्वजनिक गर्ने अपेक्षा गरिएको छ । डेलावरमा बाइडेनसँगै उनकी श्रीमती जिल बाइडेन, उपराष्ट्रपति उमेदवार कमला ह्यारिस र उनको श्रीमान् डुगलस एम्हफ पनि रहनेछन् ।
अबको चार वर्ष अमेरिकालाई कुन बाटोमा लैजाने भन्ने कुरा अहिले अमेरिकी मतदाताहरूको हातमा छ ... । - बीबीसी
