वाशिङ्टन । अमेरिकी राष्ट्रपति डोनल्ड ट्रम्प अब अरूलाई कोभिड-१९को संक्रमण सार्ने खतरा नरहेको उनको उपचारमा रहेका चिकित्सकले बताएका छन् । ट्रम्पको उपचारमा संलग्न चिकित्कक डा. सीन कोन्लेले दिएको यो विवरण नै ट्रम्पको स्वास्थ्यबारे बिहीवार यताको पहिलो औपचारिक विवरण हो ।
कोरोना भाइरस संक्रमणका कारण अस्पतालमा भर्ना भए यता पहिलोपटक राष्ट्रपति ट्रम्पले शनिबार व्हाइट हाउसमा समर्थकहरूको भिडलाई सम्बोधन गरेका थिए । तीन दिन अस्पताल उपचार गराएका ट्रम्पले अरूलाई रोग सार्ने हुन् कि भनेर गम्भीर चासो व्यक्त भएको थियो ।
चिकित्सकले उनको शरीरमा अब ‘भाइरस संख्या बढाउन सक्ने किसिमको स्थितिमा नरहेको’ भन्दै उनको शरीरमा भाइरसको संख्या घटिरहेको जनाएका छन् । डा. कोन्लीले राष्ट्रपति ट्रम्पको शरीरमा कति भाइरस छ भन्ने जाँचिएको बताए।
उनले भने, “राष्ट्रपति सीडीसीले तय गरेको मापदण्ड बमोजिम आइसोलेसनबाट बाहिर निस्कने अवस्थामा पुगेको जानकारी गराउन चाहन्छु । आज बिहानको गरिएको जाँचबाट उनीबाट अब अरूलाई कोभिड-१९ सर्ने खतरा छैन ।”
ट्रम्पलाई १० दिनअघि कोरोना भाइरसको लक्षण देखिएको थियो । पछि उनी अक्टोबर २ तारिखका दिन अस्पताल भर्ना गरिएको थियो ।
अस्पतालमा उनलाई अन्य औषधिसहित डेक्सामेथासोन नामको स्टेरोइड दिइएको थियो जुन प्राय:जसो भाइरसका कारण स्वास्थ्य अवस्था गम्भीर रहेकाहरूलाई दिने गरिन्छ ।
डा. कोन्लीको यो पछिल्लो अभिव्यक्ति ट्रम्पले व्हाइट हाउसमा भएको एक भेलामा "आफूले राम्रो" महसुस गरिरहेको बताएसँगै सार्वजनिक भएको हो । उनले हाल आफूले कोभिड-१९ विरुद्ध कुनै पनि किसिमको औषधि नलिएको बताएका छन् ।
शनिबारको उक्त कार्यक्रम आधिकारिक रूपमा "शान्तिपूर्ण र्याली" थियो । तर आलोचकहरूले भने त्यो कार्यक्रम ट्रम्पको चुनावी अभियान जस्तो देखिएको टिप्पणी गरेका छन् । - बीबीसी
