काठमाडौं । दक्षिण एसिया फुटबल महासंघ (साफ) ले २०२० का लागि साफ युथ प्रतियोगिताहरू रद्द गर्ने निर्णय गरेको छ ।
दक्षिण एसियाको वर्तमान अवस्थाको कारण जनाउँदै महासंघले बुधबार युथ प्रतियोगिता स्थगित भएको जनाएको हो । 

महासंघले आफ्ना सबै सदस्य राष्ट्रहरूसँग छलफल गरेपछि युथ प्रतियोगिता रद्द गर्ने निर्णय गरेको जनाएको छ । यसअघि २०२० का लागि महासंघले तीनवटा युथ प्रतियोगिताहरूको निर्धारित गरिएको थियो ।

सबै सदस्य राष्ट्रहरूसँग जुनमा बसेको भर्चुअल बैठकमा डिसेम्बर २०२० मा कम्तिमा दुई युथ प्रतियोगिता आयोजना गर्ने सम्भावना हेर्न सेप्टेम्बरमा महामारीको स्थितिको पुनः अवलोकन गर्ने सम्झौता भयो थियो । तर, दक्षिण एसिया पछिल्लो समय संक्रमणको संख्या बढ्दै गएपछि महासंघले यस्तो निर्णय लिएको हो ।

“महासंघले अहिलेको अवस्थाका कारण २०२० का लागि तीनवटै युथ प्रतियोगिता रद्द गर्ने निर्णय गरेको छ,” महासंघले सबै संघलाई पत्र पठाएको छ । यसअघि बंगलादेशमा आयोजना हुने तय भएको साफ प्रतियोगिता २०२१ सम्मका लागि स्थगित गरिसकेको छ ।