नयाँ दिल्ली । भारतमा कोरोना भाइरस संक्रमिको संखया ५० लाख नाघेको छ । कोरोना भाइरस महामारीबाट सर्वाधिक प्रभावित देशहरूको सूचीमा भारत अमेरिकापछि दोस्रो स्थानमा छ ।

अन्य देशको तुलनामा भारतमा कोभिड-१९ तीव्र गतिमा फैलिरहेको देखिएको छ । त्यहाँ मंगलबारसम्म निरन्तर पाँच दिन दैनिक ९०,००० भन्दा बढी संक्रमित फेला परेका छन् । 

कोभिड-१९ का कारणले भारतमा हालसम्म ८०,००० भन्दा बढी संक्रमितको मृत्यु भइसकेको छ । कोरोना संक्रमितको उपचारका लागि सघन उपचारका लागि अस्पतालमा शय्या र अक्सिजनको अभाव देखिएको बीबीसीले जनाएको छ । 

संक्रमित धेरै भए पनि संक्रमणबाट मृत्यु हुनेको संख्या अन्य मुलुकभन्दा कम रहेको छ । 

देशको आर्थिक स्थिति बिग्रिन थालेको र लाखौं मानिसले जीविकोपार्जन गर्न नसकेको भन्दै सरकारले महामारी नियन्त्रणका लागि पहिला लगाइएका बन्देजहरू हटाउन थालेपछि संक्रमण दर बढेको हो । 

कोरोना संक्रमणले व्यापक रुप लिन थालेपछि भारतमा गत मार्चमा राष्ट्रव्यापी लकडाउन गरिएको थियो । त्यतिबेला स्थिति असामान्य भइसकेको थिएन । बिस्तारै मुम्बई र दिल्लीजस्ता ठूला सहर र अन्यत्र पनि संक्रमण फैलियो । संक्रमितको संख्या बढ्दै गए पनि सरकारले मानिसहरूको गतिविधिमा लगाइएका प्रतिबन्धहरू खुकुलो बनाएपछि संक्रमण दर तीव्ररुपमा बढेको हो । 

गत साता मात्र भारतमा छ लाख संक्रमित थपिएका छन् ।  विगत २४ घण्टामा ९० हजार १२३ जनामा संक्रमण पुष्टि भएपछि कुल संक्रमितको संख्या ५ लाख २० हजार ३५९ पुगेको छ ।

केही समययता श्वासप्रश्वासमा समस्या भएका संक्रमितको संख्या बढेपटि कृत्रिम अक्सिजनको माग पनि बढेको छ । अस्पताल र स्वास्थ्यकेन्द्रहरूले यो महिना दिनहुँजसो दुई हजार ७०० टन अक्सिजन खपत गरिरहेका छन् । अप्रिलमा केवल ७५० टन अक्सिजन खपत भएको अल इन्डिया इन्डस्ट्रियल ग्यासेस म्यानुफ्याक्चरर्स असोशीएशनले जनाएको छ । 

अक्सिजन उत्पादकहरूका अनुसार धेरै कलकारखानाहरू फेरि खुलेकाले औद्योगिक प्रयोजनका लागि पनि अक्सिजनको माग बढेको छ । धेरै संक्रमण देखिएका महाराष्ट्र, मध्य प्रदेश, गुजरात, राजस्थान, तेलांगाना र आन्ध्र प्रदेश राज्य बढी प्रभावित भएका छन् ।  - बीबीसी