एजेन्सी । स्पेनिस ला लिगा फुटबलमा शीर्ष स्थानको रियल मड्रिडले संघर्षपूर्ण जित निकालेको छ । एथ्लेटिक बिल्बाओको घरेलु मैदानमा आइतबार बेलुका भएको खेलमा रियलले १-० गोलको जित निकालेको हो ।
पाहुना टोली रियललाई जित दिलाउन कप्तान सर्जियो रामोसले खेलको एक मात्र निर्णायक गोल गरे । उनले पहिलो हाफ गोलरहित बराबरीमा रोकिएको खेलको दोस्रो हाफमा गोल गर्दै जित दिलाएका थिए ।
खेलको ७३ औं मिनेटमा रामोसले पेनाल्टीमा निर्णायक गोल गरेका हुन् । एथ्लेटिक बिल्बाओका डानी गार्सियाले मार्सेलोलाई पेनाल्टी क्षेत्रमा लडाएपछि रियलले पेनाल्टी पाएको थियो । जसमा रामोसले सहजै गोल गरेका हुन् ।
यस जितसँगै उपाधि होड बलियो बनाएको रियलले दोस्रो स्थानको बार्सिलोनालाई सात अंकले पछि पारेको छ । रियलले ३४ खेलमा ७७ अंक जोड्दा एक खेल कम खेलेको बार्सिलोनाको ७० अंक छ । यता पराजित एथ्लेटिक बिल्बाओ ४८ अंकसहित आठौं स्थानमा छ ।