विराटनगर । श्रीमतीकै योजनाअनुरुप विराटनगरका औषधि व्यवसायी ३३ वर्षीय देवीप्रसाद दुलालको हत्या भएको प्रहरीको प्रारम्भिक अनुसन्धानबाट देखिएको छ ।
जिल्ला प्रहरी कार्यालय मोरङले सोमबार भर्चुअल प्रेस मिट आयोजना गरी श्रीमती मीना श्रेष्ठ दुलालकै योजनाअनुसार दुलालको हत्या भएको खुल्न आएको जानकारी दिएको हो । जिल्ला प्रहरी प्रमुख एसपी विश्व अधिकारीले प्रारम्भिक अनुसन्धानले श्रीमती श्रेष्ठले अरु दुई जना युवकको साथ लिएर बेडरुममै श्रीमानको हत्या गरेको जानकारी दिएका छन् ।
अधिकारीले भने,‘‘श्रीमानसँगको बिग्रदो सम्बन्धका कारण उनलाई सबक सिकाउने भन्दै योजनागत रुपमा मीनाले हत्या गराएको देखिन्छ ।’’
प्रहरीले घटनामा संलग्न श्रेष्ठसहित सिरहा लहान नगरपालिका वडा नम्बर १० घर भई विराटनगर ४ को बुढाथोकी फार्मेसीमा कार्यरत २१ वर्षका ब्रम्हदेव साह र उनका इटहरी नगरपालिका वडा नम्बर १२ बस्ने वर्ष २० को सोनु साहलाई पक्राउ गरेको छ ।
प्रहरीका अनुसार दुलाल ३ गते राति आफ्नो दुई जना मित्रहरुलाई खानपिनका लागि घरमै बोलाएका थिए । उनीहरुको खानपिन सकिएपछि दुलाल बेडरुममा सुत्न गए । त्यहीबेला मीनाले ब्रम्हदेवलाई आफ्नो घर आउन खबर गरेको र गेट आफैं खोली उनीहरुलाई घरको माथिपट्टिको कोठामा लुकाएर राखेकी थिइन ।
एसपी अधिकारीले भने,‘‘श्रीमान सुतेपछि आफूसमेत लागेर घाँटीमा प्लास्टिकको डोरीले कसेको र त्यो चुडिन गई उनको निधार झ्यालमा ठोक्किन गई चोट लाग्न पुगेको रहेछ ।’’ त्यही क्रममा सोनुले खुट्टा समाएको र दुलाल मृत भए नभएको परीक्षण गर्न दुबैले पेटमा लात्तीले हानेको अनुसन्धानबाट खुल्न आएको एसपी अधिकारीले बताए ।
तीनै जना राति २ बजेसम्म त्यही कोठामा बसेको तथा ब्रम्हदेव र सोनु गएपछि श्रीमानसँग खानपिनका लागि आएकामध्ये एकजनालाई मीनाले नै टेलिफोन गरी श्रीमान एक्कासि अचेत भएकोले एम्बुलेन्स मगाई अस्पताल लग्न आग्रह गरेको प्रहरीको अनुसन्धानबाट खुल्न आएको पत्रकार सम्मेलनमा जानकारी दिइएको छ ।
दुलाललाई अस्पताल लग्दालग्दै बाटोमै मृत्यु भएको भन्ने देखाउन सबै योजना मीनाले बुनेको र उनलाई गोल्डेन अस्पताल लगेकोमा प्रहरी प्रदेश प्रहरी कार्यालय तथा जिल्ला प्रहरीको टोलीले घटना शंकास्पद मानी शव पोस्टमार्टमको लागि पठाएको थियो । एसपी अधिकारीले भने,‘‘अस्वभाविक रुपमा शरीरमा चोट पटक समेत देखिएकोले यो कतर्व्य गरी हत्या गरेको हुनसक्ने हामीले प्रारम्भिक आंकलन गरेका थियौं ।’’
ब्रम्हदेव पहिले विराटनगर महानगरपालिका- १० मधुमारा बस्दै आएका सुनसरीका खनारका ३३ वर्षीय दुलालले सञ्चालन गरेको पाथीभरा फर्मामा काम गर्दथे । तर, पछि उनलाई कामबाट हटाइएको थियो । प्रहरीका अनुसार दम्पतीबीच सम्बन्ध राम्रो थिएन । मीनाले साहसँग आफ्ना श्रीमानसँग हुने गरेको खटपट र विवादको विषय भने शेयर गर्ने गरेको प्रहरी अनुसन्धानबाट खुलेको छ ।
उनीहरुबीच इमोमा कुराकानी हुने गरेको देखिए पनि त्यो सबै डिलिट गरेको पाइएको एसपी अधिकारीले जानकारी दिए । उनले भने,‘‘मृतकको घाँटीमा बसेको दाग मेट्न मीनाले नै पोन्ड्स पाउडर दलेको र हत्यामा सर्जिकल ग्लोब्ससमेत प्रयोग भएको पाइएको छ ।’’
मीना र देवीप्रसादबीच दश वर्षअघि प्रेम विवाह भएको थियो । उनीहरुका ८ वर्षका छोरा छन् । छोरालाई अर्कै कोठामा सुताएर मीनाले घटना गराएको प्रहरीको निश्कर्ष छ । तीनै जनालाई प्रहरीले ज्यान मुद्दामा अनुसन्धान अघि बढाएको छ ।