विराटनगर । प्रदेश १ सरकारले अस्पतालहरूलाई स्वास्थ्य सामग्री वितरण गर्ने क्रमलाई गति दिएको छ ।

सम्भावित कोरोना रोग (कोभिड १९) को संक्रमण जोखिम बढेसँगै सरकारले प्रदेशका विभिन्न जिल्लामा अवस्थित अस्पताल र त्यहाँ कार्यरत स्वास्थ्यकर्मीका लागि सरकारले स्वास्थ्य सामग्री व्यवस्थापन गरेको हो । 

सरकारले प्राप्त गरेका स्वास्थ्य सामग्री वितरणलाई तिव्रता दिइएको मुख्यमन्त्री तथा मन्त्री परिषद्को कार्यालयले जनाएको छ । मन्त्रालयका कानुन सचिव भरतमणि रिजालले दिएको जानकारीअनुसार सरकारले प्राप्त गरेका र मौज्दात रहेका स्वास्थ्य सामग्री निकासीलाई गति दिइएको छ । रिजालले भने, ‘‘स्वास्थ्य सामग्री अभाव हुन नदिन सरकार सम्वेदनशील छ ।’’

प्रदेश सरकारले सबैभन्दा धेरै संख्यामा प्राप्त मास्क मौज्दातसमेत नराखी अस्पताल र स्वास्थ्य केन्द्रहरूलाई उपलब्ध गराएको छ । सरकारसँग भएको कुल ४२ हजार १ सय थान मास्क निकासी भइसकेको छ । मंगलबारसम्म जम्मा ३२ हजार ९ सय मास्क निकासी भएको थियो । बुधबार ९ हजार २ सय मास्क निकासी भएको छ । 

सरकारसँग मंगलबारसम्म जम्मा ५ सय ५३ थान व्यक्तिगत सुरक्षात्मक उपकरण (पीपीई) सेट प्राप्त भएकोमा जम्मा निकासी ४ सय ६१ भएको छ । यसको मौज्दात अब ९२ थान छ । आईआर थर्मोमिटर २७ रहेकोमा जम्मा निकासी २० र मौज्दात ७ रहेको छ मुख्यमन्त्री तथा मन्त्रिपरिषद् कार्यालयले जनाएको छ ।

यसैगरी एक्जामिनेसन ग्लोब्स ५८ हजार रहेकोमा पुन २२ हजार ५ सय प्राप्त भएको छ । बुधबारसम्म जम्मा ३६ हजार ४ सय २६ निकासी भई अब ४४ हजार ७४ थान मौज्दात रहेको छ । ह्यान्ड सेनिटाइजर एक हजार ८ सय ९४ रहेकोमा बुधबार थप २ सय ४५ प्राप्त भएको छ । यसको जम्मा निकासी एक हजार ६ सय ८५ र मौज्दात ४ सय ५४ छ । पिपिई गाउन एक हजार ८ सय ७१ रहेकामा २५ थान पुन प्राप्ति र निकासी ६ सय ६३ भई मौज्दात एक हजार २ सय ३३ रहन गएको छ । 

यसैगरी नेबुलाइजर प्राप्त भएको ४० थान र मौज्दात पनि त्यति नै, सर्जिकल ग्लोब्स एकसय थान निकासी भई ७ सय थान मौज्दात, शुकभर २५ थान निकासी भई एक हजार एक सय ७५ थान मौज्दात, क्याप ६ सय थान प्राप्त र त्यति नै मौज्दात, सोडियम हाइपोक्लोराइट जार ४ थान प्राप्त भएकै परिमाणमा मौज्दात छ । यसैगरी एन९५ मास्क ४ सय ८० थान प्राप्त भएकोमा जम्मा निकासी २ सय ५८ भई अब मौज्दात २ सय २२ रहेको छ । 

कोरोनाको संक्रमण फैलन नदिन र सचेत रहन सरकारले लगाएको लकडाउन अवधिमा घरबाट बाहिर ननिस्कन प्रदेश सरकारले आह्वान गर्दै आएको छ । व्यक्तिगत स्वास्थ्यमा समेत ध्यान दिन सरकारको आग्रह छ ।