पञ्जाब । भारतको पञ्जाबमा नोभेल कोरोना भाइरसबाट ज्यान गुमाएका एक ७० वर्षीय वृद्धले २३ जनालाई संक्रमित बनाएको बताइएको छ । मार्च १८ मा मृत्यु भएका ती वृद्धले मृत्युअघि कम्तीमा २३ जनालाई कोरोना संक्रमण गराएको हुनसक्ने भारतीय सञ्चारमाध्यम एनडीटिभीले जनाएको छ ।
पञ्जाबमा हाल ३३ जना कोरोना संक्रमित फेला परेका छन् । गुरुद्वाराका पुजारीसमेत रहेका ती वृद्ध दुई सातादेखि जर्मनी र इटालीबाट दुईजना साथीसहित फर्किएका थिए । उनी जर्मन र इटाली भ्रमणबाट फर्किएपछि सेल्फ-क्वारेन्टाइनमा बस्न अस्वीकार गर्दै विभिन्न स्थानमा मानिसहरुलाई भेटेका थिए ।
उनी मार्च ६ मा दिल्ली पुगेका थिए भने त्यहीबाट पञ्जाब आएका थिए । भारतीय अधिकारीहरुले उनले भेटेका मानिसहरुलाई खोज्ने काम जारी राखेका छन् । उनी मार्च ८-१० सम्म आनन्दपुर साहिबमा आयोजित एक कार्यक्रममा सहभागी भएका थिए । त्यहाँबाट उनी शाहीद भगवत सिंह नगर जिल्लामा फर्किएका थिए ।
उनले कोरोना परीक्षणबाट पोजेटिभ देखिनुअघि करिब १०० जनालाई भेटेका थिए । उनी र उनका दुई अन्य साथीहरुले करिब १५ गाउँ भ्रमण गरेको हुनसक्ने बताइएको छ ।
उनका परिवारका १४ जनामा कोरोना पोजेटिभ देखिएको छ । उनका नाति र नातिले पनि कयौं मानिसलाई भेटेका थिए ।
अधिकारीहरुले गाउँ-गाउँ गएर संक्रमितले भेटेका मानिसहरुको खोजी गरिरहेका छन् । तीनजना मानिसको लापरबाहीका कारण अन्य कयौं मानिसहरु संक्रमित हुनसक्ने अनुमान गरिएको छ ।
भारतमा हालसम्म करिक २० जनाको मृत्यु भइसकेको छ भने ७०० भन्दा बढी संक्रमित भएका छन् । - एनडीटिभी