काठमाडौं । बजारमा भोलिदेखि आधा सिलिन्डर ग्यास उपलब्ध हुने भएको छ । कोरोना भाइरसका कारण आपूर्ति बिथोलिएर ग्यासको सम्भावित अभावलाई मध्यनजर गर्दै ७.१ केजी ग्यास भरेको सिलिन्डर उपलब्ध गराउन लागिएको हो ।
नेपाल आयल निगमले एलपी ग्यास उद्योगीहरूलाई आधा भरिएको सिलिन्डर बजारमा उपलब्ध गराउन निर्देशन दिएको हो । एलपी ग्यास उद्योग संघका अध्यक्ष गोकुल भण्डारीले निगमबाट यस्तो निर्देशन आएको पुष्टि गरे ।
यही विषयमा बिहीबार मन्त्रालयले ग्यास उद्योगीलाई छलफलका लागि बोलाएको छ । आधा ग्यास उपलब्ध गराउने विषयमा ग्यास उद्योगी पनि सकारात्मक देखिएका छन् । भण्डारीले बाह्रखरीसँग भने, “राज्यले ग्यासको सहज उपलब्धताका लागि दिएको यो निर्देशन स्वागतयोग्य छ । हामीले राज्यले भनेको मान्नैपर्छ र यस्तो अवस्थामा मान्ने प्रतिबद्धता गर्दछौं ।” उद्योगीले राज्यलाई साथ दिए आपूर्ति सहज हुने उनको भनाइ छ ।
भण्डारीले भोलिदेखि नै आधा भरिएको सिलिन्डर उपलब्ध गराउन आफूहरू तयार भएको पनि बताए । उनले भने, “आजको छलफलपछि हामीसँग उपलब्ध ग्यासले आजै रातिसम्म ग्यास सिलिन्डर आधा भर्न सक्नेछौं । यसको अर्थ भोलिदेखि नै बजारमा आधा भरिएका सिलिन्डर उपलब्ध गराउन सकिन्छ ।”
यसअघि नाकाबन्दीका बेलामा आधा भरिएको ग्यास सिलिन्डर बजारमा उपलब्ध गराइएको थियो ।