दाङ । प्रदेश ५ सरकारले कोभिड १९ नियन्त्रण तथा रोकथामका लागि विशेष योजना तयार पारेको छ । कोरोना रोकथामका लागि प्रदेश ५ सरकारले १० करोडको कोष स्थापना गरेको छ ।
उक्त कोषमा प्रदेश ५ मन्त्रिपरिषदका सदस्यहरुले एक महिनाको पारिश्रमिक जम्मा गर्ने निर्णय भएको मुख्यमन्त्री शंकर पोखरेलका प्रेस संयोजक शेरबहादुर केसीले बताए । कोषमा स्थानीय सरकार, प्रदेश सभाका सदस्य, प्रदेश सेवामा कार्यरत राष्ट्रसेवक कर्मचारी तथा प्रदेशमा कार्यरत विभिन्न संघ-संस्था र विभिन्न व्यक्तिबाट प्राप्त सहयोग जम्मा गरिने उनले जानकारी दिए । उनका अनुसार उक्त रकम कोभिड १९ को नियन्त्रण, उपचार र राहतमा मात्र खर्च हुनेछ ।
यसका साथै प्रदेश सरकारअन्तर्गत ४ ठाउँमा कोरोना उपचारका लागि आइसोलेसन अस्पताल सञ्चालनका लागि दुई-दुई करोड प्रदान गर्ने निर्णय भएको छ । प्रदेश सरकारका मन्त्रीहरुलाई त्यसको संयोजन गर्ने जिम्मेवारी प्रदान गरिएको छ ।
दाङ बेलझुन्डीका लागि कुलप्रसाद केसी, नेपालगन्जको धम्बोझीका लागि वैजनाथ चौधरी बुटवलका लागि लीला गिरी र भैरहवा भीम अस्पतालका लागि सामाजिक विकासमन्त्री सुदर्शन बराललाई जिम्मेवारी दिइएको छ ।
