काठमाडौं । कैलालीको गौरीफन्टा नाकामा भारतबाट आएका पाँचसय बढी नेपाली अलपत्र परेका छन् ।
संघीय सरकारले सीमामा अलपत्र नेपालीलाई प्रवेश अनुमति दिने निर्णय गरे पनि आज बिहानैदेखि लकडाउन गरिएपछि उनीहरु सीमा क्षेत्रमा अलपत्र परेका हुन् ।
अलपत्र परेका नेपालीहरुले आफ्नो देशमा प्रवेश पाउनुपर्ने माग गरेका छन् । उनीहरुले सीमा क्षेत्रमा चर्को नारावाजी गरेका छन् ।
कैलालीका प्रमुख जिल्ला अधिकारी यज्ञराज बोहोरोले सोमबार साँझसम्म नाकामा पुगेका सबैलाई नेपाल प्रवेशको अनुमति भए पनि अहिले बिहानदेखि लकडाउन भएकाले उनीहरुलाई आउन दिने कि नदिने भन्ने विषयमा छलफल भइरहेको बताए ।
जिल्ला प्रहरी कार्यालय कैलालीका प्रवक्ता डीएसपी दक्षकुमार बस्नेतले लकडाउन भइसकेपछि सीमा क्षेत्रमा आएकालाई प्रवेश नदिइएको बताए ।
उनले सीमा पूर्ण रोक लगाइएकाले के गर्ने भन्ने विषयमा छलफल भइरहेको बताए ।
