काठमाडौं । कृपालुजी महाराजका नेपाली प्रचारक स्वामी हरिदासजीद्वारा दिइएको जीवन, मृत्युको रहस्य विषयक प्रवचनलाई समेटेर तयार गरिएको पुस्तक ‘जीवन–मृत्यु रहस्य’को नेपाल प्रज्ञा प्रतिष्ठानका कुलपति गंगाप्रसाद उप्रेतीले एक समारोहका बीच लोकार्पण गरे ।
काठमाडौंमा शुक्रबार राधा माधव समिति, नेपालले आयोजना गरेको कार्यक्रममा पुस्तक सार्वजनिक गर्दै कुलपति उप्रेतीले यस्ता आध्यात्मिक पुस्तकहरूले जीवनलाई सार्थक बनाउन मद्दत गर्ने कुरामा जोड दिए । जीवनको रहस्य र तत्व बुझ्न र चिन्न, यस्ता चिन्तनयुक्त किताबहरूले मानिसलाई हमेशा सहयोग गर्ने उप्रेतीको भनाइ थियो ।
कार्यक्रममा सुरेशप्रकाश आचार्यले पुस्तक स्वामी हरिदासजीको विचारहरूको संगालो भएको बताउँदै प्रस्तुत ग्रन्थ स्वामी हरिदासजीले कास्कीको लेखनाथमा दिएको प्रवचनमालाको लिखित रुप भएको बताए ।
राधा माधव समिति नेपालका कार्यवाहक अध्यक्ष गोपालप्रसाद सापकोटाको सभापतित्वमा सम्पन्न कार्यक्रममा ३ नम्बर प्रदेश सदस्य नरोत्तम बैद्य, पूर्वमन्त्री दिनबन्धु अर्याल, शान्तिलक्ष्मी शाक्यलगायत राधा माधव समितिसँग आवद्ध अनुयायीहरुको उपस्थिति थियो ।