काठमाडौं । दामनको एक होटलमा बेहोस अवस्थामा भेटिएका आठजना भारतीय पर्यटकको मृत्यु भएको छ ।

उनीहरुको निसास्सिएर मृत्यु भएको बताइएको छ ।

नेपाल प्रहरीका सहप्रवक्ता एसएसपी उमेशराज जोशीले दिएको जानकारीअनुसार भारतको केरला क्षेत्रबाट नेपाल घुम्न आएका आठजना पर्यटकको मृत्यु भएको छ ।

उनले बाह्रखरीसँगको कुराकानीमा हिटर तापेर सुतेका उनीहरु सबै बिहान अचेत अवस्थामा होटलमा फेला परेका थिए ।

दामनको एभरेष्ट पानारोमा होटलमा बसेका उनीहरु बिहान अचेत अवस्थामा फेला परेका थिए ।

उनीहरुलाई हेलिकोप्टरमार्फत् काठमाडौंको ह्याम्स अस्पतालमा ल्याइएको थियो ।

मृत्यु हुनेमा चार बालबालिका रहेको बताइएको छ ।

जिल्ला प्रहरी कार्यालयका प्रहरी नायव उपरीक्षक यज्ञप्रसाद भट्टराईले रिसोर्टमा कोठामा हिटर बालेर सुतेका कारण निसास्सिएर मृत्यु भएको हुन सक्ने रासससँगको कुराकानीमा बताएका छन् ।

पोखरा घुमेर उनीहरु सोमबार बेलुका सो रिसोर्टमा बास बस्न पुगेका थिए ।