पोखरा । दोस्रो संस्करणको पोखरा प्रिमियर लिग (पीपीएल) क्रिकेटअन्तर्गत बुधबार भएको खेलमा चितवन राइनोज्ले पोखरा पल्टनलाई ६ विकेटले पराजित गरेको छ । 

पोखराले दिएको १०८ रनको लक्ष्य चितवनले १४ ओभर ५ बलमा ४ विकेट गुमाउँदै पूरा गरेको हो । 

पोखरा रंगशालमा चितवनलाई जित दिलाउन बाबर हायातले अर्धशतकीय पारी खेले । बाबरले १२ ओभरको तेस्रो बलमा अर्धशतक पूरा गरेका हुन् । उनले ३४ बलमा चार चौका तीन छक्का प्रहार गर्दै अर्धशतक पूरा गरेका थिए । 

बाबरले अर्धशतकसँगै नट आउट ६६ रन बनाए । त्यस्तै सन्नी पटेलले नट आउट २२ रन बनाएका हुन् । अनिल शाह खाता नखोलेर चितवनको पहिलो विकेटको रुपमा आउट भए । उनलाई पहिलो ओभरको पाँचौ बलमा राशिद खानले क्याच आउट गराएका हुन् । चितवनले पाँचौ ओभरको तेस्रो बलमा आफ्नो दोस्रो किवेट गुमायो । राशिद खानले व्यक्तिगत दोस्रो विकेटमा रोहन मुस्तफालाई ११ रनमा क्याच आउट गराएका हुन् । 

चितवनले तेस्रो विकेटको रुपमा कप्तान पारस खड्कालाई गुमायो । पारसलाई सरवजित लड्डाले सातौं ओभरको अन्तिम बलमा क्याच आउट गराएका हुन् । यसअघि टस हारेर पहिले ब्याटिङ गरेको पोखराले निर्धारित २० ओभरमा सम्पूर्ण विकेट गुमाउँदै १०७ रन बनाएको थियो । 

पोखराले दोस्रो ओभरको तेस्रो बलमा पहिलो विकेट गुमाएको थियो । पोखराका कुशल भुर्तेल ५ रन बनाएर आउट भएका हुन् । उनलाई सन्नी पटेलले एलबीडब्लु आउट गराएका हुन् । चितवनका लागि पाँचौ ओभरको अन्तिम बलमा बिक्रम सोबले दोस्रो विकेट लिए । उनले आसिफ शेखलाई १० रनमा क्याच आउट गराएका हुन् । 

पोखराले १० ओभरको चौथो बलमा आफ्नो तेस्रो विकेट गुमायो । चितवनका कप्तान पारस खड्काले रविइन्दर सिंहलाई १० रनमा बोल्ड आउट गरेका हुन् । पोखराका विनोद भन्डारी ७ रन बनाएर आउट भए । उनलाई चितवनका भुवन कार्कीले १२ ओभरको अन्तिम बलमा क्याच आउट गराएका हुन् । 

पोखराले १८ ओभरको पाँचौ र छैटौ बलमा लगातार दुई विकेट गुमायो । पोखराका कप्तान शरद भेषवाकर ४५ रन बनाउँदै आउट भए । उनलाई रोहन मुस्तफाले क्याच आउट गराएका हुन् । त्यसको अर्को बलमा पोखराका पाथमेस डाके खाता नखोलेर नै आउट भए । 

पोखराले १९ ओभरको दोस्रो बलमा आफ्नो नवौं विकेट गुमायो । पोखराका सरजित लड्डा खाता नखोलेर आउट भए । आजको जितसँगै चितवनले एक खेलबाट दुई अंक जोडेको छ । पराजित पोखराको दुई खेलबाट दुई अंक छ ।