विराटनगर । प्रदेश १ को प्रदेश सभामा प्रमुख प्रतिपक्षी दल नेपाली कांग्रेसले अवरुद्ध गरेपछि संसद बैठक २० मिनेटका लागि स्थगित गरिएको छ । नेपाली कांग्रेसका सांसदले बैठक सुरु भएलगत्तै आफ्नो कुर्सीबाट उठेर विरोध जनाएका थिए ।
प्रमुख प्रतिपक्षीले विरोध जनाएपछि प्रमुख सचेतक केदार कार्कीलाई आफ्नो कुरा राख्नका लागि समय उपलब्ध गराएका थिए । प्रमुख सचेतक कार्कीले सामाजिक विकास समितिबाट पारित भएको मनमोह विश्वविद्यालयको प्रतिवेदन सदनको कार्यसूचीबाट हटाउनुपर्ने माग गरेका थिए । उनले यो विधेयक फिर्ता लिएर विस्तृत रुपमा ल्याउनुपर्ने माग राखेका हुन् ।
उनले भने, "कानुन निर्माणको प्रक्रियामा सधैं सरकारलाई साथ दिएका थियौं । तर, यसपटक मनमोहनको नाम र साख नै खुम्च्याउने गरी ल्याइएको विधेयक मान्य हुनेछैन ।"
मनमोहन विराटनगरकै राजीनीति अगुवा नेता भएकोले उनको साखलाई उचो बनाउनुपर्ने कांग्रेसको ठहर छ ।
आफ्नो माग सम्बोधन नभए रोष्टम घेराउ गर्नेसमेत चेतावनी दिएका छन् ।
यो विधेयकको प्रतिवेदन सोमबार प्रदेश १ सामाजिक विकास समितिले बहुमतले पारित गरेको थियो । तर, कांग्रेसले उक्त प्रतिवेदन यही हालतमा पारित गर्न नहुने भन्दै नोट अफ डिसेन्ट लेखेको थियो ।
उक्त प्रतिवेदन अनुसार विश्वविद्यालयको 'बोर्ड अफ गर्भनर्स' को विषयमा कांग्रेसले आपत्ति जनाएको छ ।
