काठमाडौं । लघुकथा समाज नेपालले स्थापनाको ११औं वार्षिकोत्सबका अवसर पारेर नेपाली साहित्यका दुई स्रष्टालाई सम्मानित गर्दै लघुकथा दिवश मनाएको छ । काठमाडौंमा विहीबार आयोजित एक कार्यक्रममा प्रमुख अतिथि वाङमय शताब्दी पुरुष सत्यमोहन जोशीले साहित्यकारहरू सरुभक्त र इन्दिरा प्रसाईँलाई सम्मान तथा पुरस्कृत गरे । 

समाजले पद्मा रामचन्द्र लघुकथा सम्मान सरुभक्तलाई र धनमान लघुकथा पुरस्कार इन्दिरा प्रसाईलाई प्रदान गरेको छ । दुबै पुरस्कारको राशी १० हजार १०१ रुपैयाँको रहेको छ । कार्यक्रममा प्रमुख अतिथि सत्यमोहन जोशीले लघुकथाका विषयमा आफ्नो अनुभव बताएका थिए । कार्यक्रमा दुबै साहित्यकारको परिचय प्रा.डा. लक्ष्मणप्रसाद गौतमले दिएका थिए ।

समाजका अध्यक्ष श्रीओम श्रेष्ठको सभापतित्वमा सम्पन्न कार्यक्रममा अशेष मल्ल, सरुभक्त, इन्दिरा प्रसाई, धनमान श्रेष्ठ, डा. पुष्करराज भट्ट, तुलसीहरि कोइरालाले बोलेका थिए । लघुकथा समाज र सर्वनामको आयोजनामा सम्पन्न कार्यक्रमको अन्त्यमा राज शाहको निर्देशनमा सरुभक्तले लेखेको दुई लघुकथा र इन्दिरा प्रसाईले लेखेको एक लघुकथा मञ्चन गरिएको थियो ।