काठमाडौं । महानगरीय प्रहरी बृत्त थानकोटले अटोमेटिक पेस्तोल दुई थान र गोली २० राउण्डसहित विप्लव कार्यक्रतालाई पक्राउ गरेको छ । चन्द्रागिरी नगरपालिका-२ नागढुंगास्थित चेकप्वाइन्टबाट अटोमेटिक पेस्तोल दुई थान र गोली २० राउण्डसहित एकजनालाई प्रहरीले पक्राउ गरेको जनाइएको छ ।

महानगरीय प्रहरी बृत्त थानकोटका  डीएसपी कुमारबिक्रम थापाका अनुसार ललितपुर कोन्ज्योसम गाउँपालिका-२ बस्‍ने अन्दाजी २८ वर्षीय मुनाल भन्‍ने सुलभ लामालाई पक्राउ परेका हुन ।
 
थापाका अनुसार  धादिङबाट काठमाडौं आउँदै गरेको बा २ ख १९८० नम्बरको बस जाँच गर्ने क्रममा बसमा सवार लामाको साथमा रहेको झोला जाँच गर्ने क्रममा झोलाभित्र उक्त पेस्तोल तथा गोली लुकाई छिपाई राखेको अवस्थामा फेला परेको हो ।

लामाको साथबाट उषा लेखिएको ९० एमएलको तेल रहेको बोतल दुई थान, बाइनाकुलर एक थान, मोबाइल पाँच थान तथा विभिन्‍न सम्पर्क नम्बरहरु भएको डायरी तथा कागजातहरु समेत प्रहरीले बरामद गरेको छ ।

प्रहरीको प्रारम्भिक अनुसन्धानबाट लामा विप्लव कार्यक्रता रहेको खुलेको छ । लामालाई थप आवश्यक कारवाही तथा अनुसन्धानको लागि महानगरीय प्रहरी परिसर काठमाडौं पठाइएको महानगरीय प्रहरी वृत्त थानकोटले जनाएको छ ।