काठमाडौं । सडकदेखि सदनसम्म तातेको र राष्ट्रिय चासोको विषय बनेको निर्मला पन्त बलात्कार–हत्याकाण्डको अनुसन्धान अझै जारी छ । तर अभियुक्तको पहिचान भने एक वर्ष बित्न लाग्दा पनि हुन सकेको छैन । 

केन्द्रीय अनुसन्धान व्युरो (सीआईबी)को टोलीले घटनाको अनुसन्धान गरिरहेको छ । प्रहरीकै जिम्मेवार अधिकारी बर्खास्त र निलम्बनमा परेको निर्मला हत्याकाण्डमा संलग्नको पहिचान हुन नसक्दा प्रहरी संगठन र सरकार नै आलोचनाको तारो बन्न पुग्यो । गत साउन ११ गते बलात्कारपछि हत्या गरिएको अवस्थामा कञ्चनपुर भीमदत्तनगर–२ महुलीयाकी १३ वर्षीया बालिका निर्मला फेला परेकी थिइन् । 

निर्मला हत्याकाण्डपछि चर्किएको आन्दोलनमा एक जनाको ज्यानै गयो । स्थानीयले अनुसन्धानमा सहयोग नगरेको गुनासो तत्कालीन प्रहरी अधिकारीहरुले गर्दै आएका थिए । पछिल्लो समय प्रहरी र जनताको सम्बन्धमा सुधार आएको र अनुसन्धानमा सकारात्मक प्रगति भइरहेको अनुसनधानमा संलग्न एक अधिकारीले बताए । अनुसन्धानका क्रममा प्रहरीले पटक–पटक विभिन्न व्यक्तिलाई पक्राउ गरेर डीएनए परीक्षण गरेपनि निर्मलाको शरीरबाट निकालिएको स्याम्पलसँग डीएनए नमिल्दा छुट्ने गरेका छन् ।

नेपालमा बलात्कारको घटनामा डीएनए परीक्षण गरिएको यो नै पहिलो घटना हो । शंकाको विश्वसनीय सुई प्रहरीले अझै भेट्टाएको छैन । बेलाबेला अनुसन्धानका क्रममा नयाँ–नयाँ तथ्य फेला पर्छन् तर त्यसलाई पुष्टि गर्ने प्रमाण फेला नपर्दा अनुसन्धान निष्कर्षमा पुग्न नसकेको हो । निर्मला हत्याकाण्डमा हालसम्म ७८ जना शंकास्पद व्यक्तिहरुको डीएनए परीक्षण गरिएको छ । नेपाली सेनाका जवानदेखि राष्ट्रिय अनुसन्धान विभागका कर्मचारी (सीआईडी) सम्मको रगत परीक्षणका लागि झिकिएको थियो । केही राजनीतिक दलका नेता–कार्यकर्ता, निर्मलाका आफन्तको रगतसमेत डीएनए परीक्षणका लागि लिइएको थियो । प्रहरी अधिकारीका अनुसार आफन्तदेखि स्थानीय, आपराधिक गतिविधिमा संलग्न सबैमाथि निगरानी बढाइएको छ ।

पछिल्लो ११ महिनामा प्रहरीले शंकास्पद एक हजार भन्दा बढीसँग सोधपुछ र ६ सय बढीसँग बयान लिएको छ । कल डिटेल हेर्नेदेखि शंकास्पद व्यक्तिको सामाजिक सञ्जालमाथि समेत निगरानी बढाइएको थियो ।  तत्कालीन प्रहरी नेतृत्वले गत भदौ ४ गते दिलिपसिंह विष्टलाई मुख्य अभियुक्तका रुपमा सार्वजनिक गरेको थियो । तर दिलिपको डिएनए निर्मलाको भेजिनल स्वाबसँग मेल नखाएपछि उनी छुटेका थिए ।

तर दिलिप हत्यारा हुन् कि होइनन् भन्नेमा प्रहरीमै दुईमत छ । एकथरी प्रहरी अधिकारी दिलिपको संलग्नता नहुने दाबी गर्छन् भने अर्कोथरी प्रहरी अधिकारी अनुसन्धान अहिल्यै सकियो भन्न नमिल्ने तर्क गर्दै आएका छन् । प्रहरीले देशदेखि विदेशमा भएका शंकास्पदमाथि निगरानी बढाएको छ । पछिल्लो समय प्रहरीले आसपासका सबै वडाका घरका सदस्यको विवरण संकलन गरेको थियो ।