काठमाडौं । प्रमुख प्रतिपक्षी दल नेपाली कांग्रेसका नेता प्रकाशमान सिंहले पार्टीप्रति जनचासो बढिरहेको भए पनि आकर्षक कार्यक्रम दिन नसक्दा अलमलको स्थिति रहेको बताएका छन् ।
कांग्रेस पर्साले बिहीबार पार्टी कार्यालय वीरगञ्जमा आयोजना गरेको कार्यकर्ता भेटघाट कार्यक्रममा नेता सिंहले पार्टीलाई संस्थागत रुपमा चलाउनुनै मुख्य चुनौती रहेको बताए ।
‘‘देशभरी कांग्रेसप्रति जनचासो बढिरहेको छ तर आकर्षक कार्यक्रम दिन नसकेकाले कांग्रेस अलमलको स्थितिमा छ,’’ उनले भने, ‘‘पार्टीलाई संस्थागत रुपमा चलाउनु नै मुख्य चुनौती छ ।’’ कांग्रेसभित्र ‘डायनामिक’ नेताको खोजी भइरहेको भन्दै उनले गतिशील र मजबुत कांग्रेसको अपेक्षा मुलुकले गरिरहेको बताए ।
सिंहले सरकार एकपछि अर्कोगरी विवादस्पद मुद्दामा फसिरहेको भन्दै जनभावनको ख्यालै नगरी सरकार मनोमानी ढंगले प्रस्तुत हुनु दुःखद भएको बताए । उनले सरकारले गुठीसम्बन्धि विधेयक फिर्ता नलिए देशव्यापी आन्दोलनको सुरुवात हुने पनि चेतावनी दिए ।
‘‘गुठी विधेयकलाई सरकारले फिर्ता लिनुपर्छ । विधेयकको विरोधमा राजधानीबासीहरु आन्दोलित भइरहेका छन्,’’ नेता सिंहले भने, ‘‘विधेयक फिर्ता नलिए देशव्यापी आन्दोलन सुरू हुन्छ ।’’