काठमाडौं । एसिया कप व्हील चियर ट्वान्टी-ट्वान्टी क्रिकेटको उद्घाटन खेलमा नेपाल भारतसँग ६ विकेटले पराजित भएको छ । बुधबार भएको पहिलो खेलमा नेपाल बलियो प्रतिस्पर्धी भारतसँग पराजित भएको हो ।
कीर्तिपुरस्थित त्रिवि क्रिकेट मैदानमा भएको खेलमा टस हारेर पहिले ब्याटिङ गरेको नेपालले दिएको १ सय ४१ रनको लक्ष्य पछउने क्रममा भारतले १५ ओभर १ बलमा ४ विकेट गुमाउँदै पूरा गर्यो ।
पहिलो खेलमा भारतलाई जित दिलाउन गौरब विश्वनाथले अर्धशतकीय पारी खेले । उनले अविजित रहदै ५० रन पूरा गरेका हुन् । यस्तै पर्शुराम देशाईले १९ रन बनाउँदा निकुलले १६ तथा सौरभ मलिकले १४ रनको योगदान गरे ।
बलिङतर्फ नेपालका यम बहादुर श्रेष्ठ, विपिन पौडेल, डम्बर मगरले र राजु कटवाल एक-एक विकेट लिए ।
यसअघि नेपालले निर्धारित २० ओभर खेल्दै ४ विकेट गुमाएर १ सय ४० रनको योगफल तयार पारेको थियो । नेपालका लागि कप्तान डिगम सिंह चेम्जोङले अर्धशतकीय पारी खेले ।
उनले अविजित रहँदै ६६ रन बनाएका थिए । यस्तै विपिन पौडेलले अविजित रहँदै ३३ तथा रमेश खत्रीले १५ रन बनाउन सफल भएका थिए । लिग चरणको खेलपछि शीर्ष २ टोलीले फाइनलमा प्रतिस्पर्धा गर्नेछन् ।