काठमाडौँ । चर्चित कवि धर्मेन्द्र नेम्वाङको कविता कृति ‘मैले बोल्दा देशको नक्सा हल्लिन्छ’ सार्वजनिक भएको छ । कवि नेम्वाङ रंगवादी साहित्यका एक अभियन्ता मानिन्छन् । 

काठमाडौंमा हालै आयोजित एक कार्यक्रममा कवि धर्मेन्द्र नेम्वाङको कविता कृति सार्वजनिक भएको हो । सो कविता संग्रहमा कवि धर्मेन्द्रका नयाँ र पुराना गरेर कुल ३९ कविताहरु समावेश छन् । 

काव्यकृतिको विमोचन कार्यक्रममा वरिष्ठ कवि तथा पूर्व कुलपति बैरागी काइँला, कवि श्रवण मुकारुङ, सृजनशील अराजकताका अभियन्ता कवि हाङ्युग अज्ञात, लीलालेखनका अभियन्ता लेखक डा. रत्नमणि नेपाल र समालोचक अनुपमा रेग्मी उपस्थित थिए । 

मदन पुरस्कार विजेता तथा सृजनशील अराजकताका अभियन्ता मध्येका एक राजन मुकारुङले कार्यक्रम सञ्चालन गरेका थिए । कविता संग्रह ‘मैले बोल्दा देशको नक्सा हल्लिन्छ’लाई फिनिक्स बुक्सले बजारमा ल्याएको हो ।