काठमाडौं । श्रीलंकामा आइतबार भएको बम विस्फोटका कारण २९० जनाको मृत्यु भएको छ भने करिब ५ सय घाइते भएका छन् । मृत्यु तथा घाइते हुनेमा विदेशी नागरिक पनि छन् । 

श्रीलंकाको तनावपूर्ण अवस्थाका कारण त्यहाँ रहेका नेपालीको अवस्था के कस्तो होला भनेर नेपालमा रहेका कतिपय आफन्तहरुमा चिन्ताको अवस्था पनि रहेको पाइएको छ । श्रीलंकामा सामाजिक सञ्जाल पनि बन्द भएका कारण उतातिर तत्काल सम्पर्क हुन गाह्रो भइरहेको छ ।

यस मामिलामा के कसरी चासो दिइरहेको छ त नेपाल सरकारले ? परराष्ट्र मन्त्रालयका प्रवक्ता भरतराज पौड्यालले बाह्रखरीसँग सोमबार कुरा गर्दै भने,‘‘ नेपालीलाई त्यहाँ केही भएको छैन । हामी कोलम्बोस्थित नेपाली दूतावासको नियमित सम्पर्कमा रहेका छौं ।’’

अमेरिकालगायत कतिपय मुलुकले अहिले आफ्ना नागरिकलाई श्रीलंकामा  सुरक्षा सतर्कता अपनाउन आग्रह गर्दै सर्कुलर जारी गरिसकेका छन् । नेपालले पनि त्यस्तो कुनै सर्कुलर जारी गरेको छ कि भन्ने प्रश्नमा पौड्यालले भने, ‘‘हामीले त्यस्तो केही जारी गरेका छैनौं  ।’’ त्यहाँ कर्फ्यू लागेकोले अहिले हिँडडुलको अवस्था नरहेको समेत उनले बताए । 

यद्यपि अन्तर्राष्ट्रिय उडान भने जारी रहेकोले विभिन्न मुलुकहरुले आफ्नो देशका नागरिकलाई सुरक्षा सतर्कता अपनाउन आग्रह गरेका हुन् । करिब १४ घण्टाअघि श्रीलंकाको कोलम्बोबाट सामाजिक सञ्जालमा नेपाली नागरिक परशु गौतमले फेसबुकमा लेखेका छन्, ‘‘सामान्य रुपमा सुरक्षाका कारण श्रीलंकामा सामाजिक सञ्जाल बन्द गरिएको छ । हामीले तपाईंको फोन कल वा मेसेज फर्काउन नसके पनि हामी सुरक्षित छौं । सबैलाई धन्यवाद ।’’

उनीसँग बाह्रखरीको प्र्रत्यक्ष सम्पर्क हुन सकेन ।   श्रीलंकामा आइतबार शृंखलाबद्ध रुपमा भएको ८ विस्फोटका क्रममा ठूलो जनधनको क्षति गराएको छ । सो घटनामा ३६ जना विदेशीको मृत्यु भएको श्रीलंका सरकारले जनाएको छ । तर, पूर्ण विवरण भने खुलिसकेको छैन । 

मारिने विदेशीमध्ये कम्तिमा ५ जना बेलायती, ती मध्ये दुई जनाको अमेरिकासँगको संयुक्त नागरिकता रहेको, तीन जना डेनिस, १ जना पोर्चुगिज, तीन जना भारतीय, दुई टर्कीका इन्जिनियर, द नेदरल्याण्ड्सका १ जना र १ जना जापानका रहेको सम्बद्ध देशले जनाएका छन् । 

कोलम्बोमा बौद्ध भिक्षु, विद्यार्थी, व्यापारी र विभिन्न सेवा क्षेत्रमा काम गर्ने व्यक्तिहरू तथा  तिनका परिवारका सदस्यसमेत झन्डै चार४ सय नेपाली भएको बताइएको छ । श्रीलंका भरीमा भने करिब १ हजारको हाराहारीमा नेपाली रहेको बीबीसीले जनाएको छ । नेपालका तर्फबाट श्रीलंकामा भएको विस्फोटको घटनाको निन्दा गरिनुका साथै प्रधानमन्त्री केपी शर्मा ओलीले श्रीलंकाका प्रधानमन्त्री रणिल बिक्रमासिंगेलाई फोन गरेर आतंककारी घटनाको निन्दा गर्नुका साथै शोक समेत व्यक्त गरेका थिए ।

श्रीलङ्का सरकारले विदेशी कूटनीतिज्ञहरूसँग भेटघाट गरेर आइतबारको घटनाक्रमको बारेमा  औपचारिक जानकारी दिने सम्भावना रहेको बताइएको छ ।