काठमाडौं । नेपाली कांग्रेसका केन्द्रीय सदस्य रमेश लेखकले सरकारप्रति जनता असन्तुष्ट रहेको बताएका छन् । नेपाल प्रेस युनियन ओखलढुंगाले शनिबार आयोजना गरेको पत्रकार सम्मेलनमा लेखकले सरकारका कामकारबाहीबाट जनता आजित भइसकेको बताए ।
“सरकार सम्पूर्णतामा असफल भइसक्यो । आर्थिक अनियमितता र भ्रस्टाचारमा सरकार लिप्त छ । महालेखाको प्रतिवेदनअनुसार अघिल्लो वर्षको तुलनाम बेरुज बढेको र खर्चमा अनियमितता भएको छ,” लेखकले भने, “ विकासको नाममा तल्लो तहसम्म नै भ्रस्टाचार भएको छ । उपभोक्ता समितिमार्फत काम गर्न लगाएर सरकारले भ्रस्टाचार संस्थागत गरेका छ ।”
विश्वबाट हराइसकेको कम्युनिस्ट विचार नेपालबाट पनि हराउँदै जाने भन्दै नेता लेखकले विकास र समृद्धिको नारा दिएर जनतालाई कम्युनिस्टहरुले भ्रम छरेको बताए ।
“फर्सी कुहिए जस्तै यो सरकार पनि आफैँ ढल्छ तर सरकारसँगै जनताले बलिदान गरेर ल्याएको ब्यवस्था पनि कम्युनिस्टका कारण जान्छ कि भन्ने कांग्रेसको चिन्ता रहेको छ,” उनले भने ।