काठमाडौं । नेपाल चिकित्सक संघले आन्दोलनरत सरकारी चिकित्सकसँग वार्ता गर्न सरकारलाई ७२ घण्टाको अल्टिमेटम दिएको छ ।
वार्ताको माध्यमबाट समस्या समाधान गर्न नेपाल चिकित्सक संघले माग गरेको हो । बिहीबार प्रेस विज्ञप्ती जारी गदै सरकारले आन्दोलनरत सरकारी चिकित्सकहरुसँग वार्ताको माध्यमबाट समस्या समाधान गर्न संघले माग गरेको हो ।
“चिकित्सकहरुको माग र संवेदनशिलतालाई बेवास्ता गरेमा संघले सशक्त विरोधका कार्यक्रमहरु देशभर सञ्चालन गर्न बाध्य हुनेछौं”, संघले जारी गरेको विज्ञप्तीमा भनिएको छ ।
शान्तिपूर्ण विरोध प्रदर्शनमा उत्रेका चिकित्सकहरुलाई नै प्रहरी लगाई धरपकड गर्ने र चिकित्सकहरुलाई चिढ्याउने सरकारी सेवाप्रति वितृष्णा पैदा गर्ने कार्य गरेको संघको ठहर छ ।
सरकारी चिकित्सकहरुले समायोजनमा संघमा राख्न माग गर्दै सात दिनदेखि आकस्मिक बाहेकका सेवा ठप्प पारेर आन्दोलनमा उत्रिएपछि संघले बिहीबार बृहत बैठक बोलाएको थियो ।